სასამართლო დღეს არის მაქსიმალურად დამოუკიდებელი. ინდივიდუალური მოსამართლეების როლი თანდათან ძლიერდება. ჩემი ამოცანაც ის იქნება, რომ ამ პროცესს შევუწყო ხელი, - ამის შესახებ იუსტიციის უმაღლესი საბჭოს ახლად არჩეულმა წევრმა დიმიტრი გვრიტიშვილმა განაცხადა.
როგორც გვრიტიშვილმა აღნიშნა, მასაც აქვს რეზონანსული, ე.წ პოლიტიკური ელფერის მქონე საქმეები, თუმცა, ეს არ უნდა აძლევდეს არავის უფლებას ზღვარგადასული, შეურაცხმყოფელი შეფასებების გაკეთების სასამართლოს და ცალკეული მოსამართლეების მიმართ.
"ლევან მურუსიძის მიმართ ხშირად ისმის დაუსაბუთებელი, ზღვარგადასული კრიტიკა. ეს კრიტიკაც აღარ არის, ეს შეურაცხყოფაა ღირსების შემლახავი. მე პირადად მეამაყება, რომ ლევან მურუსიძის მეგობარი ვარ. რაც შეეხება მოსამართლეების მიმართ არსებულ მოსაზრებებს მათ მიერ განხილული საქმეებიდან გამომდინარე, მეც მაქვს ასეთი რეზონანსული, ე.წ პოლიტიკური ელფერის მქონე საქმეები, რომელთა განხილვაც მოსამართლეებს გვიწევს და მომავალშიც მოგვიწევს, თუმცა, ეს არ უნდა აძლევდეს არავის უფლებას ზღვარგადასული, შეურაცხმყოფელი შეფასებების გაკეთების სასამართლოს და ცალკეული მოსამართლეების მიმართ", - განაცხადა დიმიტრი გვრიტიშვილმა.