არა მგონია, რომ არასამთავრობოებს ღირსებას მატებდეს, დონორებისგან გამოყოფილი თანხებით უსუსური ვიდეო-კლიპების გაკეთება, რასაც აკეთებდნენ, - ამის შესახებ იუსტიციის უმაღლესი საბჭოს ყოფილმა მდივანმა, ლევან მურუსიძემ განაცხადა.
ის არასამთავრობო სექტორის კრიტიკას, რომ უმაღლესი საბჭოს წევრები მასთან დაახლოებული პირები არიან, გამოეხმაურა და აღნიშნა, რომ სასამართლო კორპუსში ადამიანი არ მოიძებნება, რომელთანაც მას სიახლოვე არ აქვს.
"შემიძლია ნებისმიერ ადამიანზე მიგითითოთ, ვისთანაც მჭიდრო, კარგი და მეგობრული ურთიერთობა მაქვს. კოლეგიალობაზე საუბარი აღარ არის, ნებისმიერი კანდიდატი, ვინც არ უნდა ყოფილიყო დასახელებული, იტყოდნენ, რომ ლევან მურუსიძესთან არის დაახლოებული, რადგან ყველასთან მაქვს ძალიან ახლო ურთიერთობა.
იმედი მაქვს, რომ არასამთავრობოები, რომლებსაც ჩემი პიროვნების ირგვლივ ანტიპათია ჰქონდათ, პიროვნულ დამოკიდებულებას გვერდზე გადადებენ. მიხარია, რომ ვადა ამოვწურე და ჩვეულებრივი მოსამართლე ვიქნები. არა მგონია, რომ არასამთავრობოებს ღირსებას მატებდეს, დონორებისგან გამოყოფილი თანხებით უსუსური ვიდეო-კლიპების გაკეთება, რასაც აკეთებდნენ. ეს იყო სირცხვილი", - განაცხადა მურუსიძემ.