საპარლამენტო უმრავლესობის წევრი დავით მათიკაშვილი პრეზიდენტის ადმინისტრაციის უფროსის მიერ გაკეთებულ განცხადებას ეხმიანება და მას ურჩევს, რომ კანონით დადგენილ უფლებამოსილებების ფარგლებს ნუ გასცდება.
„პრეზიდენტის ადმინისტრაციის უფროსს ვურჩევდი ნუ გასცდება კანონით მისთვის დადგენილ უფლებამოსილებების ფარგლებს. მათ რომ თავიდანვე მიეღოთ მონაწილეობა ამ პროცესში, იქნებოდა გაცილებით უკეთესი, პოზიტიური და შედეგებზე ორიენტირებული, ნაცვლად იმ დესტრუქცივიზმიმისა, რაც პრეზიდენტის ადმინისტრაციამ სახელმწიფო საკონსტიტუციო კომისიის მუშაობის მთელი დროის განმავლობაში აწარმოა“, - აცხადებს დეპუტატი.
მისივე თქმით, შედარება იმისა, რომ ქართულმა ოცნებამ თვითონ ინდივიდუალურად მიიღო კონსტიტუცია არის ტყუილი და საზოგადოების მოტყუება, რადგანაც, სახელმწიფო საკონსტიტუციო კომისიაში მონაწილეობდნენ როგორც საპარლამენტო, ასევე არასაპარლამენტო ოპოზიცია, არასამთავრობო სექტორი და ორი თაობის კონსტიტუციონალისტები, მაღალი დონის პროფესიონალები.
„ეს კონსტიტუციური ცვლილებები, რაც მოიწონა კომისიამ საერთო სახალხო განხილვების შედეგად ასევე, საზოგადოების მიერ იქნა მოწონებული ასევე, ვენეციის კომისიის შედეგად ერთმმნიშვნელოვნად იქნა მოწონებული. ეს ყველაფერი მეტყველებს მხოლოდ ერთ რამეზე, რომ ჩვენ ვდგევართ სწორ გზაზე და ნაცვლადა იმ არადემოკრატიული და არაჯანსაღი კონსტიტუციისა, რომელიც ნაციონალურმა მოძრაობამ დაგვიტოვა, ჩვენს ქვეყანას აუცილებლად ექნება ძალიან კარგი და დემოკრატიული კონსტიტუცია“, - აცხადებს მათიკაშვილი.
საქართველოს პრეზიდენტის ადმინისტრაციის უფროსმა, გიორგი აბაშიშვილმა განაცხადა, რომ ის დოკუმენტი, რომელიც მიიღო ერთმა პოლიტიკურმა პარტიამ, არ არის ის დოკუმენტი, რომელზეც მუშაობდა თუნდაც ეს საკონსტიტუციო კომისია.
"დღეს ჩვენ საქართველოს პარლამენტის სხდომის ნაცვლად ”ქართული ოცნების” ყრილობა ვიხილეთ, სადაც მიიღეს რაღაც დოკუმენტი. იმიტომ, რომ ის დოკუმენტი, რომელიც მიიღო ერთმა პოლიტიკურმა პარტიამ, არ არის ის დოკუმენტი, რომელზეც მუშაობდა თუნდაც ეს საკონსტიტუციო კომისია. ეს არ ის დოკუმენტი, რომელიც ვენეციის კომისიაში გაიგზავნა და არც ის დოკუმენტია, რომელიც საერთო სახალხო განხილვებზე იყო შეთავაზებული. კიდევ ერთხელ მოტყუვდნენ საკონსტიტუციო კომისიის წევრები, მოატყუეს ვენეციის კომისიაც და ქართული საზოგადოებაც. დღეს ”ქართული ოცნების” ყრილობაზე, პარლამენტის სხდომა რომ ერქვა, მიიღეს სრულიად სხვა დოკუმენტი და გვთავაზობენ ვიზეიმოთ გარიგება ოცნების გუნდს შიგნით”, - განაცხადა გიორგი აბაშიშვილმა.