რუსეთის კომუნისტურ პარტიას საახალწლო არდადეგების გაუქმება სურს. შესაბამისი კანონპროექტი კომუნისტებმა სახელმწიფო სათათბიროში უკვე შეიტანეს. როგორც კანონპროექტის ინიციატორები აცხადებენ, ახალი წლის დღესასწაულის შემდეგ რუსეთის მოქალაქეები უხელფასოდ რჩებიან, რაც მათ სერიოზულ პრობლემებს უქმნის. კომუნისტების ინიციატივით, არასამუშაო დღედ უნდა გამოცხადდეს 31 დეკემბერი, 18 მარტი (ყირიმის ანექსიის დღე) და 7 ნოემბერი (ოქტომბრის სოციალისტური რევოლუციის დღე). კანონპროექტის მიხედვით, 1 იანვარი (ახალი წელი), 7 იანვარი (შობა), 23 თებერვალი (მამულის მცველთა დღე), 8 მარტი (ქალთა საერთაშორისო დღე), 1 მაისი (შრომის საერთაშორისო დღე), 9 მაისი (გამარჯვების დღე), 12 ივნისი (რუსეთის დღე) და 4 ნოემბერი (ეროვნული ერთობის დღე) ასევე არასამუშაო დღეებად უნდა გამოცხადდეს.