პრეზიდენტის სტუმრებისთვის მგზავრობის ხარჯების გაწევა და საჩუქრების ყიდვა იყო კანონის ფარგლებში, სდსს ახორციელებდა უბრალოდ ანგარიშსწორებას, - ამის შესახებ სახელმწიფო დაცვის სპეციალური სამსახურის ყოფილმა ხელმძღვანელმა, თეიმურაზ ჯანაშიამ ჟურნალისტებთან საუბრისას განაცხადა.
,,ის, რაც მე ბრალად მაქვს შერაცხული, იგივე მოქმედებას სახელმწიფო დაცვის სპეციალური სამსახური ახორციელებდა ჩემამდე, ჩემს პერიოდშიც და ჩემს შემდეგაც”, - აღნიშნა ბრალდებულმა.
ჯანაშია მიიჩნევს, რომ მის წინააღმდეგ დაწყებული საქმე არის პოლიტიკური სამართლის ნაწილი.
“ეს ხარჯები იყო აბსოლუტურად ლეგალური. წინააღმდეგ შემთხვევაში სახელმწიფო დაცვის სპეციალური სამსახურის ყველა ხელმძღვანელი ჩემთან ერთად ისხდებოდნენ საბრალდებო სკამზე. ის, რომ საქმე მხოლოდ ჩემს წინააღმდეგ არის, მიუთითებს, რომ საქმე არის პოლიტიკური სამართლის ნაწილი. თქვენ ფიქრობთ, რომ ხარჯები არის მხოლოდ ოფიციალური პირებისთვის? მაშინ რატომ არის ჩემი ბრალი იუშჩენკოსთვის ნაყიდი “საპონი და მაჩალკა”? – განაცხადა თეიმურაზ ჯანაშიამ.
საქმეში, რომელიც საბიუჯეტო სახსრების ხარჯვაზეა დაწყებული, საქართველოს ყოფილი პრეზიდენტი მიხეილ სააკაშვილიცაა ბრალდებული.