ჩვენც ვტოვებთ დარბაზს და საშუალებას მოგცემთ უმრავლესობას, ერთი პარტიის ხმებით, ძალიან მშვიდად, წყნარად მიიღოთ ის ცვლილებები, რომელსაც მხარს უჭერს მხოლოდ ერთი პარტია საქართველოში, - ეს განცხადება „ევროპული საქართველოს“ ლიდერმა დავით ბაქრაძემ პარლამენტის რიგგარეშე სხდომაზე სიტყვით გამოსვლისას გააკეთა, რის შემდეგაც პარტიის წევრებმა სხდომათა დარბაზი დატოვეს.
დავით ბაქრაძის განმარტებით, მისი პარტია კოლეგების ბოიკოტს ამ დრომდე მხოლოდ იმიტომ არ შეუერთდა, რათა საპარლამენტო ტრიბუნიდან საკუთარი პოზიცია დაეფიქსირებინათ.
„ჩვენ დღეს შემოვედით დარბაზში განხილვაზე და არ მივბაძეთ ჩვენს კოლეგებს სხვა ოპოზიციური ფრაქციებიდან იმიტომ, რომ მიგვაჩნია, როდესაც საქართველოს პარლამენტში განიხილება კონსტიტუციის პროექტი, არ არსებობს ამაზე უფრო მნიშვნელოვანი დებატი, განხილვა და მსჯელობა საქართველოში, ამიტომ ნებისმიერი პარლამენტის წევრის ვალია, მონაწილეობა მიიღოს, საკუთარიო პოზიცია დააფიქსიროს და საზოგადოებას საკუთარი აზრი გააგებინოს. სწორედ ამიტომ ვიყავით დღეს ამ დარბაზში, ამიტომ ვიღებდით მონაწილეობას ამ დებატში, მაგრამ დებატის ბოლოს ძალიან მკაფიოდ ჩანს - უმრავლესობა ჩამოყალიბებულია საკუთარ პრინციპებზე, პრინციპებზე, რომელიც ჩვენ მიგვაჩნია, ეწინააღმდეგება ქართველი ხალხის ნებას, ამიტომ ჩვენი პოზიცია გამოვხატეთ, ჩვენ, ქართველ ხალხთან ერთად, დავაფიქსირეთ ჩვენი აზრი, ჩვენი შეკითხვები, ჩვენი წინააღმდეგობა წარმოდგენილ პროექტთან, ამის იქით ჩვენ გვრჩება საპარლამენტო პოლიტიკური ბრძოლის მხოლოდ მეორე მეთოდი და ეს არის უკვე შემდგომ საპარლამენტო განხილვაში მონაწილეობის არმიღება, რასაც „ევროპული საქართველო“ აკეთებს, ამიტომ ჩვენც ვტოვებთ დარბაზს და საშუალებას მოგცემთ უმრავლესობას, ერთი პარტიის ხმებით, ძალიან მშვიდად, წყნარად მიიღოთ ის ცვლილებები, რომელსაც მხარს უჭერს მხოლოდ ერთი პარტია საქართველოში“, - აღნიშნა ბაქრაძემ.
შეგახსენებთ, მანამდე საკონსტიტუციო ცვლილებების საპარლამენტო განხილვებს ბოიკოტი „ნაციონალურმა მოძრაობამ“ და „პატრიოტთა ალიანსმა“ გამოუცხადეს.