ეს ჩანაწერი არ უნდა გახდეს დისკრიმინაციის საფუძველი, - ამის შესახებ პარლამენტის თავმჯდომარე ირაკლი კობახიძემ "რუსთავი 2"-ის გადაცემა "არჩევანში", კონსტიტუციაში ქორწინების განსაზღვრაზე საუბრისას განაცხადა.
მისი განცხადებით, საქართველოში ჰომოფობიური განწყობების გასაღმავებლად გარკვეული ჯგუფები მუშაობენ.
„არიან კონკრეტული ძალები, რომლებსაც აქვთ კონკრეტული კავშირები სხვადასხვა სახელმწიფოსთან და ხელოვნურად ხდება ამ ინსტრუმენტის გამოყენება, რომ გაღვივდეს საქართველოში ჰომოფობიური განწყობები და ანტიდასავლური განწყობები“, - განაცხადა ირაკლი კობახიძემ.
მისივე განცხადებით, მთავრობის ამოცანაა, ყველას, მათ შორის, უმცირესობების უფლებები იყოს დაცული.
„ჩვენი ამოცანა არის ის, რომ ნებისმიერი ადამიანის უფლებები იყოს დაცული. მათ შორის, რა თქმა უნდა, უმცირესობების უფლებები იყოს დაცული და არ გაღვივდეს საქართველოში, არავითარ შემთხვევაში, ჰომოფობიური განწყობები. ამ დეფინიციის დაზუსტება შესაბამის ძალებს გამოცლის ამის საფუძელს და ყოველგვარ საბაბს“, - განაცხადა ირაკლი კობახიძემ.