“ყველაზე მნიშნელოვანია, მივიღოთ რეგულაციები, რომ არ დავაპატიმროთ მარიხუანას მომხმარებელი”, - ამის შესახებ ჯანდაცვის საპარლამენტო კომიტეტის თავმჯდომარემ, დიმიტრი ხუნდაძემ განაცხადა.
„ჩვენ გვქონდა აზრთა სხვადასხვაობა სესიაზე. ასევე, საპირისპირო აზრები გუნდშიც იყო. თუმცა, მივედით შეთანხმებამდე, რომ კულტივირების თემა იქნება ამოღებული კანონპროექტიდან და ავტორი ამას დათანხმდა. აგრეთვე საჯარიმო სანქციები იქნება შესაბამისი, რათა მივიღოთ რეგულაციები, რომ არ დავაპატიმროთ მარიხუანას მომხმარებელი. ეს ყველაზე მნიშნელოვანია. ასევე, საჯარიმო სანქციები უნდა იყოს ისეთი, რომ არათუ ხელი შეუწყოს ნარკომომხმარებელთა რიცხვის და კონკრეტულად მარიხუანას მომხმარებელთა გავრცელებას, არამედ მის შემცირებას",- აღნიშნა ხუნდაძემ.
ჯანდაცვის კომიტეტი დღეს მარიხუანას მომხმარებელთა სისხლის სამართლებრივი პასუხისმგებლობისგან გათავისუფლებასთან დაკავშირებულ საკანონმდებლო პაკეტზე მსჯელობს. პროექტი ნარკოპოლიტიკის ნაწილობრივ ლიბერალიზაციას ითვალისწინებს, რაც კანაფისა და მარიხუანის გარკვეული ოდენობით შეძენა შენახვის, გადაზიდვისა თუ მოხმარებისთვის სასჯელის სახით პატიმრობას აუქმებს.
სისხლის სამართლის კოდექსში გათვალისწინებული ცვლილება გამორიცხავს სასჯელის სახით თავისუფლების აღკვეთის გამოყენებას გამომშრალი მარიხუანის შემთხვევაში 70 გრამამდე, ნედლი მარიხუანის შემთხვევაში − 140 გრამამდე და მცენარე კანაფის შემთხვევაში − 140 გრამამდე ნარკოტიკული საშუალების დამზადების, შეძენის, შენახვის, გადაზიდვისა და პირადი მოხმარებისთვის. თუმცა, ამ ქმედებებისათვის თავისუფლების აღკვეთა გამოყენებულ იქნება იმ შემთხვევაში, თუ ხსენებული ნარკოტიკული საშუალებების ოდენობა დიდი ან განსაკუთრებით დიდია.
