იმ შემთხვევაში, თუკი პრეზიდენტი რიგგარეშე სხდომების მოწვევის თაობაზე შესაბამის აქტს არ გამოსცემს, პარლამენტს უფლება აქვს, თავად შეიკრიბოს, - ამის შესახებ პარლამენტის საპროცედურო საკითხთა კომიტეტის თავმჯდომარემ, გიორგი კახიანმა განაცხადა.
„რეგლამენტის მიხედვით, რიგგარეშე სხდომების მოწვევის თაობაზე მოთხოვნა საქართველოს პრეზიდენტს გადაეგზავნება და პრეზიდენტი შესაბამის აქტს მიმართვიდან 48 საათის განმავლობაში გამოსცემს. იმ შემთხვევაში, თუკი ასეთი აქტი არ გამოიცა, ამ ვადის ამოწურვის შემდეგ, პარლამენტს 48 საათის განმავლობაში უფლება აქვს თავად შეიკრიბოს“, - განმარტა კახიანმა.
შეგახსენებთ, რომ პრეზიდენტმა საკონსტიტუციო ცვლილებების განსახილველად პარლამენტის რიგგარეშე სხდომის მოწვევაზე უარი თქვა.