"შრომის უსაფრთხოების შესახებ" კანონპროექტს პარლამენტის სამი კომიტეტის გაერთიანებულ სხდომაზე მხარი დაუჭირეს.
კანონპროექტის შესახებ ადამიანის უფლებათა დაცვის, დარგობრივი ეკონომიკისა და ეკონომიკური პოლიტიკის და ევროპასთან ინტეგრაციის კომიტეტების გაერთიანებულ სხდომაზე იმსჯელეს.
25 მაისის მთავრობის სხდომაზე ჯანდაცვის მინისტრმა მთავრობას შრომის უსაფრთხოებასთან დაკავშირებით კანონპროექტი წარუდგინა.
25 მაისსვე გაიმართა თბილისში შრომის უსაფრთხოებასთან დაკავშირებით კონფერენცია, რომელზეც სიტყვით საქართველოს პრეზიდენტი გიორგი მარგველაშვილი და სახალხო დამცველი უჩა ნანუაშვილიც გამოვიდნენ.
12 ივნისს კი სახალხო დამცველმა საქართველოს პარლამენტისა და შესაბამისი კომიტეტების თავმჯდომარეებს „შრომის უსაფრთხოების შესახებ“ საქართველოს კანონისა და თანმდევი ცვლილებების პროექტებთან დაკავშირებით წინადადებით მიმართა. უჩა ნანუაშვილი მიიჩნევს, რომ ინიცირებული ვერსია მნიშვნელოვან ხარვეზებს შეიცავს, ვერ უზრუნველყოფს ეფექტიანი შრომის ინსპექტირების მექანიზმის შექმნას და შრომის უსაფრთხოების სრულფასოვნად დაცვას ქვეყანაში. კერძოდ, „შრომის უსაფრთხოების შესახებ“ კანონპროექტის თანახმად, მისი მოქმედება ვრცელდება მხოლოდ მძიმე, მავნე და საშიშპირობებიან სამუშაოებზე, თუმცა უსაფრთხო და ჯანსაღი სამუშაო გარემო ყველა დასაქმებულის უფლებაა. შესაბამისად, მნიშვნელოვანია ყველა დასაქმებული იყოს უზრუნველყოფილი უსაფრთხო სამუშაო გარემოთი და აღნიშნული კანონის მოქმედება უნდა გავრცელდეს ყველა დასაქმებულზე.