„ხარშილაძის ჯიბიდან ამოღებული თეთრი ფხვნილი ნარკოტიკული ნივთიერება აღმოჩნდა“, - ამის შესახებ სამართალდამცველმა ზაქარია ვასაძემ, თბილისის საქალაქო სასამართლოში, ჟურნალისტ ელისო კილაძის შვილის, დავით ხარშილაძის პროცესზე განაცხადა.
მისივე თქმით, ხარშილაძეს არანაირი დაზიანება არ ჰქონია.
„არ მახსოვს, რამდენი ვიყავით. ინფორმაცია მივიღე ჩემი უშუალო უფროსისგან - ფოტო და მისი მონაცემები და გავედით ღონისძიებაზე. როცა ფორმებით დაგვინახა, გაიქცა ხარშილაძე და ჩიბირაშვილმა დააკავა ის, წამოვაყენეთ, დავიწყეთ ჩხრეკა და განვუმარტეთ უფლებები. მახსოვს, რომ მარჯვენა ჯიბიდან ამოვუღეთ გასაღები, ფული, პირადობა და პირადი ნივთები. ასევე, ამოვიღეთ თეთრი ფხვნილი პაკეტებში, რომელიც საბოლოოდ ნარკოტიკული საშუალება აღმოჩნდა. შემდეგ გადავიყვანეთ ის სამმართველოში. არანაირი დაზიანება მას არ ჰქონია არც დაკავებისას და არც შემდეგ მიყვანისას. რაც შეხება თარაშვილს, ის ნამდვილად იყო ღონისძიებაზე, მაგრამ მას საგამოძიებო მოქმედებეში მონაწილეობა არ მიუღია“, - განაცხადა ზაქარია ვასაძემ.