„საზოგადოებრივ მაუწყებელში დღეს არიან ისეთი პროფესიონალები, რომელთა ცოდნა და გამოცდილება ნამდვილად წაადგებოდა ბატონი გოგი გვახარიას და ქალბატონი სალომე ასათიანის გადაცემების გაუკეთესებას”, - ამის შესახებ მაუწყებლის გენერალურმა დირექტორმა, ვასილ მაღლაფერიძემ განაცხადა.
მისივე თქმით, ამაში შეურაცხმყოფელი არაფერია.
"მიუხედავად იმისა, რომ ეს მათთვის შეიძლება არაფერს ნიშნავდეს, მაღალი აზრის ვარ ამ გადაცემის ავტორების პროფესიონალიზმზე. ამავე დროს დარწმუნებული ვარ, რომ მათი გადაცემებიც საჭიროებენ მნიშვნელოვან განახლებას და ფორმატის გაუმჯობესებას. ამაში არაფერი შეურაცხმყოფელი არ არის. საზოგადოებრივ მაუწყებელში დღეს არიან ისეთი პროფესიონალები, რომელთა ცოდნა და გამოცდილება ნამდვილად წაადგებოდა ბატონი გოგი გვახარიას და ქალბატონი სალომე ასათიანის გადაცემების გაუკეთესებას. შეიძლება ვინმეს მიაჩნია, რომ საზოგადოებრივს ამის კომპეტენცია არ აქვს და ჩვენ უნდა გავუშვათ, რასაც მოგვიტანენ და აზრიც არ უნდა გამოვთქვათ, მაგრამ ჩვენ ასე არ ვფიქრობთ“, - განაცხადა ვასილ მაღლაფერიძემ.
ამასთანავე, მაღლაფერიძის განმარტებით, სალომე ასათიანის და გოგი გვახარია გადაცემები კი არ დახურეს, არამედ ხელშეკრულება აღარ გააგრძელეს.
“როცა ამის დრო მოვიდა, უარი ვთქვით ხელშეკრულების გაგრძელებაზე, რომლის მიხედვითაც, საზოგადოებრივ მაუწყებელს მხოლოდ უტყვი პლატფორმის ფუნქცია რჩება.
დეტალია, თუმცა, თვალსაჩინო, როდესაც ეს ორი გადაცემა გადის საზოგადოებრივზე, მას ორი ლოგო ადევს, რადიო თავისუფლების და საზოგადოებრივი მაუწყებლის, ხოლო როდესაც იგივე გადაცემა მეორდება რადიო თავისუფლების პლატფორმაზე, მას მხოლოდ რადიო თავისუფლების ლოგო ადევს და ჩვენი ლოგო მოხსნილია. რატომ? არ გამოვიჩინებით?! ცხადია, მხოლოდ ლოგოში არ არის საქმე, თუმცა, ლოგოშიცაა, საზოგადოებრივი მაუწყებელი არ უნდა იყოს მხოლოდ გამტარი პლატფორმა, საზოგადოებრივი მზად არის ყველა რესურსი გამოიყენოს ღია და სრულფასოვანი პარტნიორობისთვის“, - აღნიშნა ვასილ მაღლაფერიძემ.
