რუსეთი დაინტერესებულია საქართველოსთან დიპლომატიური ურთიერთობების აღდგენით, - ამის შესახებ რუსეთის ფედერაციის დუმის განათლებისა და მეცნიერების კომიტეტის თავმჯდომარე ვიაჩესლავ ნიკონოვი „მოამბესთან“ ინტერვიუში აცხადებს.
„რუსეთი საქართველოსთან დიპლომატიური ურთიერთობების შეწყვეტის მომხრე არასდროს ყოფილა. ეს იყო საქართველოს არჩევანი. საქართველო ერთადერთი ქვეყანაა პლანეტა დედამიწაზე, რომელსაც რუსეთთან არ აქვს დიპლომატიური ურთიერთობები, ამიტომაც რუსეთი, ბუნებრივია, დაინტერესებულია, რომ ეს ურთიერთობები აღდგეს, მაგრამ ეს საქართველოს სუვერენული უფლებაა“, - აცხადებს რუსი დეპუტატი.
ნიკონოვი ქართული მხარის პოზიციაზე ამახვილებს ყურადღებას, რომ დიპლომატიური კავშირები არ აღდგება ვიდრე საქართველოს ტერიტორიები ოკუპირებულია.
„საქართველო ფიქრობს, რომ ურთიერთობების აღდგენა შეუძლებელია, ვიდრე აფხაზეთი და ოსეთი საქართველოს შემადგენლობაში არ დაბრუნდება, მაგრამ დაარწმუნეთ აფხაზები და ოსები საქართველოს შემადგენლობაში დაბრუნდნენ, თუ ეს მათ მოუნდებათ. მე, სიმართლე გითხრათ, არ შემხვედრია არცერთი აფხაზი ან ოსი, ვისაც შესაძლოა ეს უნდოდეს. ეს არ არის რუსეთის გადასაწყვეტი საკითხი. შეუძლებელია, ადამიანები ძალით აიძულო დაბრუნდნენ იქ, სადაც მათ დაბრუნება არ სურთ. ალბათ, უფრო მარტივია, კოსოვო დაუბრუნო იუგოსლავიას. ნაკლებად სავარაუდოა, ეს მოხდეს. თუ თქვენ გსურთ, ვინმეს შეუთანხმდეთ, ან ვინმესთან გაერთიანდეთ, ესაუბრეთ მათ და ეცადეთ, დააინტერესოთ ისინი. იმიტომ რომ, თუ თქვენ რუსეთზე გაბრაზდებით, მასთან დიპლომატიურ ურთიერთობებს გაწყვეტთ, არაფერი შეიცვლება“, - აცხადებს რუსეთის ფედერაციის დუმის განათლებისა და მეცნიერების კომიტეტის თავმჯდომარე ვიაჩესლავ ნიკონოვი.
გუშინ, საქართველოს პრემიერ-მინისტრმა გიორგი კვირიკაშვილმა ვიაჩესლავ ნიკონოვის რეპლიკას გლობალური უსაფრთხოების ფორუმის ფარგლებში გამართულ სესიაზე უპასუხა, რომელმაც განაცხადა, რომ რუსეთი არ არის წინააღმდეგი, საქართველო და უკრაინა ევროკავშირში გაწევრიანდნენ, თუმცა წინააღმდეგია საქართველო-უკრაინის ნატო-ში ინტეგრაციის.
