კახა კალაძე ჩემი მეგობარია, არჩევნებისას ის გვერდში მედგა და თუ გუნდი მას დაასახელებს მერობის კანდიდატად, მეც მხარში ამოვუდგები. დარწმუნებული ვარ, კახა კალაძე ძალიან კარგი მერი იქნება, - ამის შესახებ თბილისის მერმა განაცხადა.
დავით ნარმანიას თქმით, მისი წარმატების ხარისხი საზოგადოებამ უნდა განსაზღვროს, მითუმეტეს, იმ უამრავი პროექტის შემდეგ, რაც გაკეთდა.
,,ახალი ავტობუსები, აღმაშენებლის გამზირი, პუშკინის ქუჩაზე ორმხრივი მოძრაობის აღდგენა, შინდისი-კრწანისის და სამება-მახათის გზა, ათზე მეტი ახალი საბავშვო ბაღი, პეკინის პროსპექტის სრული აღდგენის გეგმა და ა.შ.
რაც შეეხება გენერალური აუდიტორის თანამდებობაზე ჩემი კანდიდატურის განხილვას, კონსულტაცია ბევრ საკითხზე მიმდინარეობს. გუნდის საერთო გადაწყვეტილებით გაირკვევა, მე ვიქნები მერობის კანდიდატი თუ სხვა, ან სად გადავინაცვლებ თუ მერობის კანდიდატი აღარ ვიქნები.
უამრავი ვერსია მოვისმინე, მათ შორის თითქოს ოთარ ფარცხალაძეს ხელოვნურად შევუწყვეთ ხელი პროცესში, რასაც ცალსახად არ ვადასტურებ. ჩასანაცვლებელი ნაკვეთების მონაცემები გადაიგზავნა ექსპერტიზის ეროვნულ ბიუროში, საიდანაც მივიღეთ მიწების ღირებულების შეფასება. თუ ვინმეს კითხვა გაუჩნდება, მზად ვარ, ვუპასუხო. ვიმეორებ, კანონის ყველა ნორმა დაცულია, ვერცერთ გადაწყვეტილებაში გადაცდომას ვერ ვხედავ. ახლა საკითხს საგამოძიებო ორგანოებიც სწავლობენ, რის დასრულებასაც ასევე ველოდები. როგორ გგონიათ, გამოძიება ვინმეს რამეს აპატიებს ან თვალს დახუჭავს? კითხვის ნიშნები რომ არ მაქვს, ამიტომაც ვარ მშვიდად", - განაცხადა დავით ნარმანიამ.