გასაუბრებაზე კითხვები დაისვა იმ პერიოდზეც, როდესაც იუსტიციის მინისტრი ვიყავი, - ამის შესახებ გერმანიაში საქართველოს ელჩმა და უზენაესი სასამართლოს ყოფილმა თავმჯდომარემ ლადო ჭანტურიამ ევროსასამართლოს მოსამართლეობის კონკურსში გასაუბრების შემდეგ განაცხადა.
რა მოლოდინი აქვს და შეარჩევს თუ არა სპეციალურად შექმნილი კომისია მის კანდიდატურას, ჭანტურია პასუხობს, რომ „თავშეკავებული პროგნოზი“ აქვს.
„იყო ყველანაირი შეკითხვა ევროპის პრეცედენტული სამართლისა და სასამართლო ხელისუფლების ირგვლივ. მათ შორის, შეკითხვები დაისვა ჩემი იუსტიციის მინისტრობის პერიოდთან დაკავშირებითაც, სამართლებრივ რეფორმებზე, ევროპეიზაციის პროცესსა და ევროპული სამართლის დანერგვაზე", - განაცხადა ლადო ჭანტურიამ.
ევროსასამართლოს მოსამართლეობის კონკურსის გასაუბრებაზე შევიდა კოტე ვარძელაშვილი, რომელიც საკონსტიტუციო სასამართლოს ყოფილი მოსამართლეა. მისი თქმით, გარკვეული შეკითხვები აქვს როგორც კომისიის შემადგენლობის, ასევე კონკურსის პროცესთან დაკავშირებით, რაზეც კომისიის წევრებისგან პასუხებს ელოდება.