სტრასბურგის მოსამართლეობის კიდევ 6-მა კანდიდატმა გასაუბრება გაიარა. კანდიდატებს შორის იყვნენ მოქმედი მოსამართლეები.
"შეკითხვათა ნაწილი ეხებოდა ჩემს წარსულ საქმიანობას, ამჟამინდელ საქმიანობას, სამომავლო გეგმებს. იყო პროფესიული შეკითხვები, იუსტიციის საბჭოს გადაწყვეტილებზეც. პროცესისადმი პოზიტიურად ვარ განწყობილი. კომისიის შემადგენლობა ყველა კანდიდატის მიმართ კეთილგანწყობილია და გამონაკლისი არც მე ვყოფილვარ", - ამბობს სააპელაციო სასამართლოს მოსამართლე და იუსტიციის უმაღლესი საბჭოს წევრი შოთა გეწაძე.
"ჩვენ ვალდებული ვართ, დღესვე დავწეროთ ქულები. ქულების დაწერიდან რამდენიმე წუთში, იუსტიციის სამინისტრო ვალდებულია, გაასაჯაროოს გადაწყვეტილება. ხმა იმ კანდიდატს თუ მისცეს, რომელზეც ვთანხმდებით, რომ ძალიან კარგი იყო, მაშინ პროტესტი არ იქნება. ძალიან კრიტიკული შეკითხვებია, იუსტიციის მინისტრის მხრიდანაც კი", - აღნიშნა კომისიის წევრმა, ადვოკატთა ასოციაციის თავმჯდომარე ზაზა ხატიაშვილმა.
სახალხო დამცველი უჩა ნანუაშვილი აცხადებს, რომ საუკეთესო კანდიდატის გამოვლენისთვის მაქსიმალური პირობებია შექმნილი და რამდენად ობიექტურია კომისია, ქულების დაწერის შემდეგ გაირკვევა: "მთავარი არის არა გასაუბრების პროცესი, არამედ ის, რა მოხდება შემდეგ - კანდიდატების შეფასება. გასულ წელს ქულებით მანიპულირება მოხდა, კანდიდატებმა მიიღეს იმაზე ნაკლები ქულები, ვიდრე იმსახურებდნენ. ეს არის ჩემი შეშფოთების საგანი", - ამბობს უჩა ნანუაშვილი.
დღეს კონკურსის მესამე ეტაპია. კომისიის მიერ შერჩეული 5 პრეტენდენტის ვინაობა სავარაუდოდ საღამოს გახდება ცნობილი. შემდეგ მთავრობა 3 კანდიდატს შეარჩევს და ევროპული საბჭოს საპარლამენტო ასამბლეის ადამიანის უფლებათა ევროპული სასამართლოს მოსამართლის ამრჩევ კომიტეტს წარუდგენს (საბოლოო ვადა 31 აგვისტო). კენჭისყრა ევროპული საბჭოს საშემოდგომო სესიაზე, ოქტომბერში ჩატარდება.
ახალი მოსამართლის არჩევამდე, სტრასბურგის სასამართლოში საქართველოს მოსამართლე ნონა წოწორიაა.