საქართველოს საბოლოო მიზანი არის ნატო-ს წევრობა და არა მაპი - განაცხადა საქართველოს საგარეო საქმეთა მინისტრმა ნატო-ს საპარლამენტო ასამბლეის პოლიტიკის კომიტეტის სხდომაზე.
მიხეილ ჯანელიძემ, დაახლოებით ნახევარსაათიან გამოსვლაში, ქვეყნის მიერი მიღწეულ პროგრესზე, რეგიონში არსებულ გამოწვევებსა და სამშვიდობო პოლიტიკაზე ისაუბრა. განსაკუთრებული ყურადღება გამახვილდა ოკუპირებულ ტერიტორიებსა და იქ მცხოვრები მოქალაქეების პრობლემებზე.
,,ჩვენ მოგვეცა შესაძლებლობა, ძალიან მნიშვნელოვანი აუდიტორიისთვის გაგვეცნო ის პროგრესი, რომელიც ქვეყანაში გვაქვს და რაც აძლიერებს ჩვენს ევროატლანტიკურ ინტეგრაციას. ვისაუბრეთ ასევე რეგიონულ საფრთხეებზე, გამოწვევებზე და იმაზე თუ როგორ უწყობს ხელს საქართველო რეგიონში მშვიდობას, სტაბილურობასა და განვითარებას“, - განაცხადა საქართველოს საგარეო საქმეთა მინისტრმა.
სიტყვით გამოსვლის შემდეგ, მიხეილ ჯანელიძე დარბაზში ოპოზიციის წარმომადგენლის გიორგი კანდელაკის მიერ დასმულ კითხვასაც გამოეხმაურა. „ევროპული საქართველოს“ წევრმა კომიტეტის სხდომაზე ჯანელიძეს კრიტიკული შეკითხვები მედიაპლურალიზმის, „რუსთავი 2“-ის საქმისა და სასამართლო სისტემის შესახებ დაუსვა.
მოგვიანებით, „მოამბესთან“ საუბრისას მიხეილ ჯანელიძემ განმარტა რომ ,,იყო გარკვეული განცხადებები გაკეთებული ისევ ქართული ოპოზიციის წარმომადგენლების მხრიდან. მე ვფიქრობ, რომ ასეთი ღია დებატები კარგია, მაგრამ, ალბათ, სუბიექტური არ უნდა იყოს შეფასებები და მოსაზრებები რომელიც ჟღერდება და აზიანებს ქვეყნის იმიჯს და ამიტომ მოვუწოდებ ყველას, რომ კარგად გაიაზრონ ფორმატები, მესიჯები. ჩვენ ყველანი მზად ვართ, მთავრობა მზად არის იმუშაოს იმისათვის, რათა ქვეყნის იმიჯი იყოს პოზიტიური და ქვეყანამ მოახერხოს ინტეგრაცია ევროპულ და ევროატლანტიკურ სტრუქტურებში", - განაცხადა მიხეილ ჯანელიძემ.