ნატო-ს საპარლამენტო ასამბლეის პრეზიდენტმა მოგვილოცა ის დიდი პროგრესი, რომელიც საქართველოს აქვს მიღწეული, - ამის შესახებ საგარეო საქმეთა მინისტრიმა, მიხეილ ჯანელიძემ ნატო-ს საპარლამენტო ასამბლეის პრეზიდენტთან, პაოლო ალისთან შეხვედრის შემდეგ ჟურნალისტებს განუცხადა.
"ნატო-ს საპარლამენტო ასამბლეის პრეზიდენტმა მოგვილოცა ის დიდი პროგრესი, რომელიც საქართველოს აქვს გასული წლების განმავლობაში მიღწეული დემოკრატიული განვითარების კუთხით. დემოკრატიული ინსტიტუტების მშენებლობა არის ერთ-ერთი წინაპირობა ჩვენი ევროატლანტიკური, ევროპული ინტეგრაციის", - განაცხადა ჯანელიძემ.
მისივე თქმით, ის, რომ საქართველოში იმართება საპარლამენტო ასამბლეის საგაზაფხულო სესია, არის პოლიტიკური მხარდაჭერის, ნატო-ში ინტეგრაციის გზაზე ჩვენი დიდი პროგრესის დადასტურება.
მისივე თქმით, საუბარი ასევე შეეხო რეგიონში არსებულ გამოწვევებსაც.
"ჩვენ ვისაუბრეთ რეგიონში არსებულ გამოწვევებზე, უსაფრთხოებაზე, თავდაცვის სფეროში თანამშრომლობაზე და რამდენად მნიშვნელოვან როლს თამაშობს საქართველო ევროატლანტიკური უსაფრთხოებისთვის.
ჩვენი მიზანია, რომ ეს პოლიტიკური მხარდაჭერა ნამდვილად გაგრძელდეს, ჩვენ ველოდებით, რომ მიღებული იქნება ძალიან მნიშვნელოვანი დეკლარაცია ამ სესიაზე, რომელიც დაადასტურებს ღრმა პოლიტიკურ მხარდაჭრას ალიანსის მხრიდან", - განაცხადა ჯანელიძემ.
