სტრასბურგის სასამართლოში მოსამართლეობის კანდიდატების წარდგენისას დაშვებული შეცდომა არ უნდა განმეორდეს, - ამის შესახებ პარლამენტის ვიცესპიკერმა, თამარ ჩუგოშვილმა განაცხადა.
მისი თქმით, ამოცანა არის ის, რომ იყოს წარდგენილი იმდაგვარი სია, რომელიც არანაირ კითხვას არ გააჩენს და არ გამოიწვევს იმ შეცდომის გამეორებას, რომელსაც ადგილი ჰქონდა წინა წარდგენის დროს.
რაც შეეხება კომისიას, რომელიც მოსამართლეობის კანდიდატებს არჩევს, მისი თქმით, ამ კომისიაში ხელისუფლების გარდა არიან წარმოდგენილი როგორც არასამთავრობო სექტორის წარმომადგენლები, ასევე საქართველოს სახალხო დამცველი.
როგორც მან აღნიშნა, ხელისუფლებისთვის მთავარია, რომ სამივე კანდიდატი, რომელიც სტრასბურგის სასამართლოში საქართველოდან იქნება გაგზავნილი, იყოს იმდენად კარგი, რომ იქიდან შერჩევა არანაირ პრობლემას არ წარმოადგენდეს.
"ეს დაახლოებით წინა კომისიის მსგავსია, თუმცა გარკვეული განსხვავებული შემადგენლობა არის. მე მომდის ინფორმაცია, რომ არის მცდელობა, რომ სანამ კონკურსი ჩატარდება, მანამდე მოხდეს პროცესის იმიჯის დაზიანება, რაც ქვეყნისთვის ცუდია", - აღნიშნა თამარ ჩუგოშვილმა.
