მოხარული ვარ, რომ ჩვენს მიერ დიდი ხნის წინ დაწყებული ძალისხმევა, უკვე სხვა ხელისუფლების მიერ განხორციელდა, - ამის შესახებ „ნაციონალური მოძრაობის“ ერთ-ერთმა ლიდერმა გიორგი ბარამიძემ, ნატო-ს საპარლამენტო ასამბლეის საქართველოში ჩატარების შეფასებისას განაცხადა.
მისი თქმით, ძალიან მნიშვნელოვანია რომ ნატო-ს წევრი და პარტნიორი ქვეყნის ამდენი დეპუტატი იმყოფება საქართველოში. მისივე თქმით, ისინი ნახავენ, რომ შესაძლოა პრობლემებით ვითარდება, მაგრამ ქვეყანა ღირსია, იყოს ნატო-ს წევრი უკვე დიდი ხანია.
როგორც გიორგი ბარამიძემ აღნიშნა, საგარეო ასპარეზზე, საქართველოს პრაქტიკულად დაკარგული აქვს პოზიციები იმ თვალსაზრისით, რომ შედეგი არ გვაქვს.
„ეს არის ძალიან მნიშვნელოვანი ღონისძიება, რომ საქართველოში ტარდება ნატო-ს საპარლამენტო ასამბლეის სესია. მოხარული ვარ, რომ ჩვენს მიერ დიდი ხნის წინ დაწყებული ძალისხმევა, უკვე სხვა ხელისუფლების მიერ განხორციელდა. ასეთი ღონისძიების ჩატარება, რომელმა ხელისუფლებამაც არ უნდა განახორციელოს, ძალიან მნიშვნელოვანია და მოხარული ვარ, რომ ნატო-ს წევრი და პარტნიორი ქვეყნის ამდენი დეპუტატი იმყოფება საქართველოში, ნახავს, რომ შესაძლოა პრობლემებით ვითარდება, მაგრამ ქვეყანა ღირსია, იყოს ნატო-ს წევრი უკვე დიდი ხანია.
რაც შეეხება იმ საკითხებს, რომელიც აქ არის განხილული, მათ შორის საქართველოს თავდაცვისა და საგარეო პოლიტიკურ ორიენტირებთან დაკავშირებით, მოგეხსენებათ საქართველოს დღევანდელმა ხელისუფლებამ ისწავლა მეტ-ნაკლებად, საგარეო მესიჯების თვალსაზრისით საუბარი და აქ ალბათ ძალიან ბევრი კრიტიკა არც ღირს. თუმცა, ჩვენ, როგორც ოპოზიციას, „ნაციონალურ მოძრაობას“ გვაღელვებს რეალური შედეგი ამ საუბრების, თუმცა ეს საუბარები არ ხდება იქ, სადაც უფრო მნიშვნელოვანია, რომელსაც ის შედეგი უნდა მოჰქონდეს, რასაც ჰქვია რეალურად ჩვენი ქვეყნის თავდაცვისუნარიანობის განმტკიცება და ამ თვალსაზრისით ძალიან მძიმე მდგომარეობა გვაქვს. მეორე მხრივ, საგარეო ასპარეზზე, საქართველოს პრაქტიკულად დაკარგული აქვს პოზიციები იმ თვალსაზრისით, რომ შედეგი არ გვაქვს. ანუ საუბრობენ უკრაინის ოკუპაციაზე და საქართველოს ოკუპაციაზე საუბარი არ არის. ასეთ შეხვედრებზე, ლამაზი სიტყვებით და სწორი ფორმულირებებით საუბარს, არავითარი აზრი არ აქვს, თუ მას კონკრეტული შედეგი არ მოჰყვება“, - განაცხადა გიორგი ბარამიძემ.