ბათუმში მუსლიმებმა პარასკევის ტრადიციული ლოცვა კვლავ ღია ცის ქვეშ აღავლინეს. ისინი იმ ადგილას შეიკრიბნენ, რომელიც თავად იყიდეს მეჩეთის ასაშენებლად, მაგრამ მერიისგან სამშენებლო ნებართვა ვერ მიიღეს.
მათი თქმით, ღია ცის ქვეშ ლოცვას მანამ გააგრძელებენ, სანამ ქალაქის ხელისუფლება მშენებლობის ნებართვას არ მისცემს. მრევლი აცხადებს, რომ არსებული მეჩეთი პატარაა და ვერ ახერხებენ რელიგიური რიტუალების სრულფასოვნად ჩატარებას.
აჭარის მთავრობის თავმჯდომარემ ამ ფაქტთან დაკავშირებით განაცხადა, რომ საკითხზე მუშაობენ და აქვთ მუსლიმ მრევლთან კომუნიკაცია. მისი თქმით, უახლოეს მომავალში გამოინახება საკითხის მოგვარების ყველასათვის მისაღები გამოსავალი.