დონალდ ტრამპის სიძე ჯარედ კუშნერი გამოძიების ფედერალური ბიუროს დაკვირვების ქვეშ არის. ტელეკომპანია NBC-ის ცნობით, გამოძიება ვარაუდობს, რომ 36 წლის კუშნერი 2016 წლის საპრეზიდენტო არჩევნებში რუსეთის ჩარევის საკითხზე მნიშვნელოვან ინფორმაციას ფლობს. კუშნერის ადვოკატი აცხადებს, რომ მისი დაცვის ქვეშ მყოფი მზად არის ყველა კითხვას ამომწურავი პასუხი გასცეს. „ვაშინგტონ პოსტის“ ცნობით, გამოძიება კუშნერისა და რუსეთის ელჩის, სერგეი კისლიაკის შეხვედრის დეტალებითაც ინტერესდება. ასევე ირკვევა, რომ საარჩევნო კამპანიისას ტრამპის სიძემ შეხვედრები გამართა რუს ბანკირებთანაც. პრეზიდენტის სიძე უახლოეს მომავალში სენატის დაზვერვის კომიტეტის მოსმენაზე წარსდგება.