ამერიკის მხარემ დადებითად შეაფასა საქართველოს მიერ დემოკრატიული განვითარების მიმართულებით გადადგმული ნაბიჯები და მიღწეული პროგრესი, - ამის შესახებ საგარეო საქმეთა მინისტრის მოადგილემ დავით ზალკალიანმა საქართველო-ამერიკის შეერთებული შტატების სტრატეგიული პარტნიორობის ქარტიის კომისიის დემოკრატიისა და მმართველობის სამუშაო ჯგუფის რიგით მე-10 შეხვედრის დასრულების შემდეგ განაცხადა.
მისი თქმით, შეხვედრისას ვრცლად განიხილეს საქართველოში დემოკრატიული რეფორმების კუთხით მიღწეული პროგრესი, მათ შორის, პოლიტიკური პლურალიზმის, მედიის თავისუფლებისა და მართლმსაჯულების დამოუკიდებლობის უზრუნველყოფის მიმართულებით.
„მნიშვნელოვანი იყო საპარლამენტო უმცირესობის წარმომადგენლების დასწრება შეხვედრაზე, რადგან მათ მიეცათ საშუალება ღიად დაეფიქსირებინათ საკუთარი მოსაზრებები საქართველოში მიმდინარე დემოკრატიულ პროცესებთან დაკავშირებით. ეს არის პრაქტიკა, რომელიც 2012 წლიდან მოქმედებს და რეგულარულად დემოკრატიის სამუშაო ჯგუფის შეხვედრებში როგორც ხელისუფლების, ასევე ოპოზიციის წარმომადგენლები იღებენ მონაწილეობას.
სხვა საკითხებთან ერთად, ვრცელი საუბარი გვქონდა ქვეყანაში მიმდინარე საკონსტიტუციო რეფორმების შესახებ. მთლიანობაში შეხვედრა იყო ძალიან პოზიტიური და ნაყოფიერი. გვქონდა გულწრფელი აზრთა გაცვლა დემოკრატიის და მმართველობის კუთხით მიმდინარე რეფორმებთან დაკავშირებით.
აღსანიშნავია, რომ ამერიკის მხარემ დადებითად შეაფასა საქართველოს მიერ დემოკრატიული განვითარების მიმართულებით გადადგმული ნაბიჯები და მიღწეული პროგრესი“, - განაცხადა დავით ზალკალიანმა.