ეს არის უპრეცედენტოდ მაღალი დონის ვიზიტი ასეთი შემადგენლობით, - ასე შეაფასა საქართველოს საგარეო საქმეთა მინისტრმა მიხეილ ჯანელიძემ თურქეთის პრემიერ-მინისტრის, ბინალი ილდირიმის საქართველოში ვიზიტი, რომელიც ქვეყანას შვიდ მინისტრთან ერთად ეწვია.
როგორც ჯანელიძემ ჟურნალისტებს განუცხადა, ვიზიტის ფარგლებში ხელი მოეწერება რამდენიმე შეთანხმებას რამდენიმე სექტორში, რაც ხაზს უსვამს, რომ საქართველო-თურქეთის ურთიერთობები ვითარდება დინამურად და ორი ქვეყანა ძალიან დიდ ყურადღებას უთმობს ამ ურთიერთობების კიდევ უფრო გაღრმავებას.
"ეს არის სტრატეგიული პარტნიორობის ფორმატის მეორე შეხვედრა. პირველი შეხვედრა შარშან ანკარაში გაიმართა და წელს პატივი გვაქვს ვუმასპინძლოთ თურქეთის მთავრობას ასეთი შემადგენლობით. ეს ვიზიტი ასევე ემთხვევა საქართველოსა და თურქეთის დიპლომატიური ურთიერთობების 25 წლისთავს. უნდა აღინიშნოს, რომ ამ წლების განმავლობაში საქართველომ და თურქეთმა ჩამოაყალიბეს ნამდვილად სამაგალითო ურთიერთობა. ჩვენ ვართ სტრატეგიული პარტნიორები, ჩვენ ვავითარებთ სტრატეგიულ პროექტებს, რომელიც მნიშვნელოვანია რეგიონისთვის, ხელს უწყობს რეგიონის განვითარებას, სტაბილურობას. ჩვენთვის ძალიან მნიშვნელოვანია თურქეთის ძალიან მტკიცე მხარდაჭერა ჩვენი ტერიტორიული მთლიანობის, სუვერენიტეტისადმი, ევროატლანტიკური მისწრაფებებისადმი. ჩვენი შეხვედრა იქნება, ერთი მხრივ, 25 წლისთავის აღნიშვნისადმი მიძღვნილი, მაგრამ ასევე იქნება შინაარსობრივად დატვირთული. ხელი მოეწერება რამდენიმე შეთანხმებას რამდენიმე სექტორში, რაც ხაზს უსვამს, რომ ჩვენი ურთიერთობები ვითარდება დინამურად და ორი ქვეყანა ძალიან დიდ ყურადღებას უთმობს ამ ურთიერთობების კიდევ უფრო გაღრმავებას”, - განაცხადა მიხეილ ჯანელიძემ.
ცნობისთვის, თურქეთის პრემიერ-მინისტრი უკვე საქართველოშია.
