ეს არის ორ ქვეყანას შორის არსებული კარგი და სანიმუშო ურთიერთობების სიმბოლო და გამოხატულება, - ასე ეხმაურება თურქეთის ელჩი საქართველოში ზექი ლევენთ გუმრუქჩუ თურქეთის პრემიერ-მინისტრის ვიზიტს.
მისი თქმით, თურქეთის პრემიერ-მინისტრი საქართველოში შვიდ მინისტრთან ერთად ჩამოდის, რაც ხშირად არ ხდება.
„ძნელად მახსენდება სხვა, მსგავსი შემთხვევა. ეს არის ორ ქვეყანას შორის არსებული კარგი და სანიმუშო ურთიერთობების სიმბოლო და გამოხატულება", - აღნიშნა ელჩმა, რომელმაც აქვე დასძინა, რომ ხვალ ბინალი ილდირიმი თურქეთ-საქართველოს შორის არსებულ უმაღლესი სტრატეგიული საბჭოს მეორე სხდომას დაესწრება, სადაც ყველა საკითხი განიხილება, ეკონომიკიდან იურიდიულ სფეროში თანამშრომლობის ჩათვლით.
მისივე თქმით, აქცენტი გაკეთდება სავაჭრო-საბაჟო და კულტურული ურთიერთობების გაღრმავებაზე.
გუშინ, თურქეთ- საქართველოს დიპლომატიური ურთიერთობების დამყარებიდან 25 წლისთავი შესრულდა და ელჩის თქმით, პრემიერ-მინისტრს სურდა, ეს თარიღი საქართველოში აღენიშნა.
„თუნდაც ერთი დღის დაგვიანებით, მაგრამ მაინც, ჩვენ გვინდოდა საქართველოსთან ერთად აღგვეღნიშნა ეს ძალიან მნიშვნელოვანი თარიღი და სპციალურად ამ დღისთის მოგვეწყო ვიზიტი",- დასძინა მან.
ცნობისთვის, თურქეთის პრემიერ-მინისტრი უკვე საქართველოშია.