გავიგე, რომ პატარა შეკამათება იყო, ვინ იჩხუბა და რა გააკეთეს, მე არ გამიგია, - ამის შესახებ ღამის კლუბ „ელ ცენტროს“ დირექტორმა ილია კაპანაძემ ყოფილ მთავარ პროკურორ ოთარ ფარცხალაძესა და გენერალურ აუდიტორ ლაშა თორდიას შორის 13 მაისს მომხდარ ინციდენტზე საუბრისასა, „საზოგადოებრივ მაუწყებელს" განუცხადა.
მისი განცხადებით, მომხდარის შესახებ, გამოძიებამ „ელ ცენტროს“ თანამშრომლები სრული შემადგენლობით დაკითხა. მისივე თქმით, ინციდენტის ღამეს თავადაც იმყოფებოდა კლუბში, თუმცა „იმდენად ხანმოკლე შემთხვევა იყო“, რომ მომხდარის შესახებ, მედიით შეიტყო.
„გავიგე, რომ პატარა შეკამათება იყო. ვინ იჩხუბა და რა გააკეთეს, მე არ გამიგია. ეს ინციდენტი მასშტაბური არ იყო და ვერც იქნებოდა, რადგან დაცვა გვყავს და როდესაც რამე ხდება, მომენტალურად ახდენს რეაგირებას. მე როგორც ვიცი, ინციდენტი რამდენიმე წამის განმავლობაში ხდებოდა და შემდეგ განეიტრალდა სიტუაცია.
დაიკითხა მთელი სამუშაო პერსონალი, გარკვეული ღონისძიება ჩატარდა, რაზეც ვერ ვისაუბრებ, იმიტომ, რომ გამოძიება ჯერ არ დასრულებულა და უმჯობესია, დაელოდოთ გამოძიების შედეგებს. გამოძიება დამიკავშირდა, მთხოვეს და ინციდენტის მომდევნო დღეებში ჩატარდა საგამოძიებო ღონისძიება“, - განაცხადა ილია კაპანაძემ.
მან აქვე აღნიშნა, რომ გამოძებას ყველანაირი ჩვენება, საბუთი და ინფორმაცია აქვს.
„რაც შეეხება კამერებს, მიმართეთ გამოძიებას. ყველანაირი ჩვენება, საბუთი და ინფორმაცია აქვს გამოძიებას. დანარჩენ ინფორმაციას მიიღებთ გამოძიებისგან“, - განაცხადა ილია კაპანაძემ.
შეგახსენებთ, რომ სახელმწიფო აუდიტის ხელმძღვანელი ლაშა თორდია მასზე განხორციელებულ თავდასხმაში ოთარ ფარცხალაძეს და მის თანმხლებ პირებს ადანაშაულებს.