„სანადირო თოფები ჩემია და დანარჩენს უარვყოფ რომ ჩემია. ზეწოლაა, ანგარისშწორებაა, მეტი სხვა რა უნდა დავარქვათ ამას“,- განაცხადა ევროსასამართლოს მოსამართლის, ნანა წოწორიას ძმამ, ოთარ წოწორიამ. მისი თქმით, მისი სახლიდან ამოღებული უკანონო იარაღი მას არ ეკუთვნის და ამ მეთოდის ხელისუფლება მის დაზე ანგარიშწორებას აპირებს.
„დაათვალიერეს ყველა თარო, ყველა უჯრა, მეორე სართული, ყველაფერი თუკი რამე შეიძლებოდა შემოწმებულიყო, არ აღმოჩნდა არაფერი. ამის შემდეგ მოითხოვეს, რომ დამხმარე სათავსოები თუ გაგვაჩნია, მივუთითე და მივიყვანე, საიდანაც ჩხრეკის შედეგად მოინახა რაღაც ვაზნები. შევიდნენ სამზარეულოში, ახადეს გამწოვის თავსახური და ნახეს იქ ცეცხლსასროლი იარაღი. სანადირო თოფები ჩემია და დანარჩენს უარვყოფ რომ ჩემია. ზეწოლაა, ანგარისშწორებაა, მეტი სხვა რა უნდა დავარქვათ ამას“,- განაცხადა წოწორიამ.
ადვოკატები, რომლებიც წოწორიას სახლის ჩხრეკას დაესწრნენ, გამოვლენილ დარღვევებზე საუბრობენ. მათი თქმით, უწყებას ჩხრეკის ჩატარება მოსამართლის განჩინებითაც შეეძლო და არა ოპერატიული ინფორმაციის საფუძველზე, გადაუდებელი აუცილებლობით.