ქალაქ ზუგდიდის მერის სამოქალაქო მრჩეველთა საბჭო 7 თვითმმართველი ქალაქის, მათ შორის ქალაქ ზუგდიდის მუნიციპალიტეტის შესაძლო გაუქმებას ეწინააღმდეგება.ამის შესახებ საბჭოს მიერ გავრცელებულ განცხადებაშია ნათქვამი. განცხადების ავტორები ამბობენ, რომ მათთვის მიუღებელია ქალაქ ზუგდიდისა და სხვა მუნიციპალიტეტებისათვის თვითმმართველი ქალაქის სტატუსის ჩამორთმევა და ამის რამდენიმე გარემოებას ასახელებენ:

• თვითმმართველობების გამსხვილება აშორებს ერთმანეთთან ხელისუფლებასა და მოსახლეობას;
• გამსხვილების შემთხვევაში კიდევ უფრო გართულდება მოქალაქეთათვის სხვადასხვა სახის მუნიციპალური სერვისების მიწოდების პროცესი;
• თვითმმართველობების გამსხვილების შემთხვევაში კიდევ უფრო გაიზრდება მუნიციპალიტეტების ცენტრალურ ხელისუფლებაზე დამოკიდებულების დონე, რაც არსებული შეზღუდული უფლებამოსილებებისა თუ მწირი ფინანსური რესურსების პირობებში ისედაც რთულ პრობლემას წარმოადგენს;
• ხელისუფლება არ ითვალისწინებს განვითარებული ქვეყნების გამოცდილებას, რომელთა მაგალითზეც ადგილობრივი ხელისუფლებისა და მოსახლეობის დაახლოება მნიშვნელონად აუმჯობესებს როგორც მოქალაქეთა ჩართულობის ხარისხს, ასევე ზრდის ადგილობრივი თვითმმართველობის თანამდებობის პირთა ანგარიშვლადებულების დონესაც;
• მუნიციპალიტეტების გაყოფა, უფრო მეტი თვითმმართველი ერთეულის ჩამოყალიბება ხელს უწყობს ახალი ადმინისტრაციული ცენტრებისა თუ ეკონომიკური მიზიდულობის ადგილების წარმოქმნას, რაც ამავე დროს ქვეყნის განვითარების ერთ-ერთი საფუძველსაც წარმოადგენს.

"სამწუხაროა, რომ 2014 წელს ხელისუფლების მიერ გაცემული დაპირება დეცენტრალიზაციის პროცესის გაგრძელების თაობაზე არ სრულდება, უფრო მეტიც, ამ კუთხით ვხედავთ უკუსვლას. მოვუწოდებთ საქართველოს მთავრობას, პარლამენტს, ადგილობრივ თვითმმართველობებს უარი თქვან 2014 წელს შექმნილი 7 ახალი თვითმმართველი ქალაქისა და ამდენივე თვითმმართველი თემის გაუქმება-გაერთიანებაზე, ხელისუფლებამ უნდა განაგრძოს ხელისუფლების დეცენტრალიზაციის პროცესი, რომლის მიზანიც არა თვითმმართველობათა გამსხვილება, არამედ მეტი თვითმმართველი ერთეულის შექმნა, მუნიციპალიტეტებისათვის ჯეროვანი უფლებამოსილებებისა და ფინანსური რესურსების გადაცემა უნდა იყოს”, - ნათქვამია განცხადებაში.

ქალაქ ზუგდიდის მერის სამოქალაქო მრჩეველთა საბჭო 8 ადამიანისგან შედგება. მას ირაკლი ყალიჩავა ხელმძღვანელობს. საბჭოს წევრები მოქალაქეები და სხვადასხვა არასამთავრობო ორგანიზაციების წარმომადგენლები არიან: ეკა მინჯორაია, ირაკლი ყალიჩავა, გორგი შელია, ინგა შონია, არჩილ თოდუა, კახა ჯიქია, ვაჟა ფიფია და გიორგი შელია.

16 მაისს ცნობილი გახდა, რომ საქართველოს რეგიონული განვითარებისა და ინფრასტრუქტურის სამინისტრომ 14 თვითმმართველ ერთეულს წერილები გაუგზავნა და თვითმმართველი ქალაქებისა და სათემო მუნიციპალიტეტების გაერთიანების პროცედურების დაწყება მოსთხოვა. გავრცელებული ინფორმაციით, საკრებულოები გაერთიანების საკითხს კვირის ბოლომდე განიხილავენ.

თვითმმართველი ქალაქების შესაძლო გაუქმებაზე 29 მარტს 120-მა არასამთავრობო, სათემო და მედია ორგანიზაციამ საქართველოს პრემიერმინისტრს და პარლამენტის თავმჯდომარეს განცხადებით მიმართა და მოითხოვა, არ დაუშვას 7 თვითმმართველი ქალაქისთვის სტატუსის გაუქმება.