„საზოგადოებაში პროკურატურის მუშაობასთან დაკავშირებით კითხვის ნიშნებია“,-განაცხადა სახალხო დამცველმა უჩა ნანუაშვილმა. მან საგამოძიებო ორგანოების მუშაობაზე გაამახვილა ყურადღება და უწყებას გაწელილი საქმეები გაუხსენა.
„ის, რომ საზოგადოებაში პროკურატურის მუშაობასთან დაკავშირებით კითხვის ნიშნებია, ამაზე არა მხოლოდ სახალხო დამცველი საუბრობს, არამედ საზოგადოებას ამომწურავი ინფორმაცია აქვს არაერთი საქმის გამოძიებაზე. კითხვის ნიშნებს სწორედ ამ გამოძიების ეფექტურობის კუთხით ვსვამთ. ათეულობით საქმეა, სადაც წლობით, გაწელილი საქმეების ფონზე, შედეგი არ არის დამდგარი. განსაკუთრებით იმ საქმეებზე, რომელიც შეიძლება უფრო სენსიტიურად მივიჩნიოთ. ისევე როგორც თუნდაც, სამართალდამცავების მიერ ჩადენილი სავარაუდო დანაშაულების გამოძიებაზე. ამ მიმართულებით სერიოზული ხარვეზებია და პროკურატურასთან მიმართებაში სისტემურ ხარვეზებზე ვსაუბრობ. ერთ-ერთი ე.წ. ციანიდის საქმეა, რომელიც ნათლად აჩვენებს, იმ სისტემურ პრობლემებს, რომელიც საგამოძიებო ორგანოებშია“,-განაცხადა უჩა ნანუაშვილმა.
მან სამართალდამცავი ორგანოების მუშაობაც შეაფასა და ანგარიშში აღწერილი ბათუმის მოვლენები გაიხსენა. მისი თქმით, მოქალაქეები რამოდენიმე საათის განმავლობაში მიტოვებულები იყვნენ.
„რაც შეეხება ბათუმის ინციდენტს, ყველა პირდაპირ ეთერში ვუყურებდით, რამდენიმე საათის განმავლობაში, თუ რამდენად ეფექტური იყვნენ სამართალდამცავი ორგანოები. ვუყურებდით, რომ რამდენიმე საათის მანძილზე, მშვიდობიანი მოქალაქეები ხელისუფლების მხრიდან მიტოვებული იყვნენ. სერიოზული პრობლემაა, რომ იმ ძალადობასა და ვანდალიზმზე რეაგირება ადეკვატურად, დროულად არ იყო, რომელსაც ქალაქში ადგილი ჰქონდა“,- განაცხადა ომბუდსმენმა.