„როდის უნდა ჩარეულიყო სახელმწიფო იმისთვის, რომ ასე ვთქვათ, მის აზრით ყოფილიყო კანონმდებლობასთან შესაბამისი ეს ქმედება“,- განაცხადა პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, სოფო კილაძემ. მან სახალხო დამცველის ანგარიში შეაფასა, რომელშიც ბათუმის მოვლენებია აღწერილი. ომბუცმენის ანგარიშის მიხედვით, ადგილი ჰქონდა სამართალდამცავთა მხრიდან შეუსაბამო მოქმედებებს.
„შინაგან საქმესთან სამინისტროსთან მიმართებით, ბათუმის თემაზე კატეგორიულად ვერ დავეთანხმებით იმიტომ, რომ ჩვენ როდესაც მოსმენები გვქონდა პარლამენტში, მაშინ ბატონმა უჩამ ვერ დაგვისაბუთა ზუსტად, თუ რას მიიჩნევდა ის მიზანშეწონილად, როდის უნდა ჩარეულიყო სახელმწიფო იმისთვის, რომ ასე ვთქვათ, მის აზრით ყოფილიყო კანონმდებლობასთან შესაბამისი ეს ქმედება“,- განაცხადა კილაძემ.
მან „რუსთავი 2“-ის საქმეზეც ისაუბრა და დასძინა, რომ პროცესები სტრასბურგის სასამართლოს გადაწყვეტილებიდან გამომდინარე წარიმართება.
„ჩვენ „რუსთავი2“-თან დაკავშირებით ცალსახად ვამბობთ, რომ ეს არის სასამართლოს გადასაწყვეტი და ახლა ჩვენ ვმოქმედებთ, სწორედ იმის შესაბამისად, თუ რა დასკვნაც დადო სტრასბურგმა ამ შემთხვევაში,“ - განაცხადა სოფიო კილაძემ.