ფრაქცია "ქართული ოცნების" თავმჯდომარე მამუკა მდინარაძის განცხადებით, საკონსტიტუციო ცვლილებების პროექტის სახალხო განხილვა თბილისში აუცილებლად გაიმართება და უზრუნველყოფილი იქნება უსაფრთხოება.
,,გაგრძელდება ზოგადად საყოველთაო-სახალხო განხილვები. კანონიც ამას ითვალისწინებს, რომ მინიმუმ ერთი თვის განმავლობაში განხილვები უნდა გრძელდებოდეს. ჩვენ დღეს კომისიაზე განვიხილავთ ამ საკითხებს და ორგანიზაციულ დეტალებს შემდეგ მოგახსენებთ.
რაც შეეხება უსაფრთხოებას და სხვა საკითხებს, ჩვენ ვიქნებით ყურადღებით ყველა დეტალის მიმართ და შევეცდებით, რომ ერთი მხრივ, დემოკრატიული გარემო იყოს უზრუნველყოფილი და უსაფრთხოებაც, პროვოკაციების თავიდან არიდებაც იყოს უზრუნველყოფილი", - განაცხადა მდინარაძემ „საქართველოს კონსტიტუციაში ცვლილების შეტანის შესახებ“ და „აჭარის ავტონომიური რესპუბლიკის შესახებ“ საქართველოს კონსტიტუციური კანონპროექტების გამოქვეყნებისა და მათი საყოველთაო-სახალხო განხილვის საორგანიზაციო კომისიის გაფართოებული სხდომის დაწყებამდე.
14 მაისს, თბილისის დიდ საკონცერტო დარბაზში საკონსტიტუციო ცვლილებების პროექტის სახალხო განხილვა ჩაიშალა. ხმაური და პროტესტი დარბაზში, მიწის გასხვისების საკითხმა გამოიწვია.
