„თურქეთში მიმდინარე პროცესება არ შეიძლება ჩვენ არ გვაშფოთებდეს“,- განაცხადა პოლიტოლოგმა ირაკლი მენაღარიშვილმა „ჯი-ეიჩ-ენთან“ საუბარში. მან საქართველო-თურქეთის მეზობლობასა და პარტნიორობაზე ისაუბრა. მენაღარიშვილის თქმით, ჩვენი ქვეყნისთვის მნიშვნელოვანია სტრატეგიული პარტნიორის სტაბილურობა.
„თურქეთი საქართველოს დამოუკიდებლობის პირველივე დღიდან სტრატეგიული მოკავშირეა. ჩვენ არ გვაწყობს იქაური არასტაბილურობა და ორიენტაციის შეცვლა. ყურადღებით უნდა დავაკვირდეთ მიმდინარე მოვლენებს. თუმცა, მიმდინარე სიტუაცია არ შეიძლება, რომ შეშფოთებას არ იწვევდეს“,- განაცხადა მენაღარიშვილმა.
პოლიტოლოგის თქმით, მეზობელ სახელმწიფოში მიმდინარე მოვლენები დემოკრატიული ინსტიტუტების დასუსტებას და ქვეყნის სხვა ორიენტირით წასვლას მოასწავებს.
„განვითარებული მოვლენები ხელისუფლების ცენტრალიზაციისაკენ მიმართული მოქმედებებია. მსგავსი ნაბიჯები კი მუდამ ქმნის საფრთხეს დემოკრატიისათვის. მეორეს მხრივ, ცენტრალიზებული ხელისუფლება არ წარმოადგენს საფრთხეს, თუკი იგი დაბალანსებული იქნება სხვა ინსტიტუტებისგან. ჯერ-ჯერობით, თურქეთში არ შეინიშნება მსგავსი რამ და ამიტომაც, შეფასდა კრიტიკულად საერთაშორისო თანამეგობრობისა და მოსახლეობის ნაწილის მხრიდან“,- აღნიშნა ირაკლი მენაღარიშვილმა „ჯი-ეიჩ-ენთან“.
იგი ცოტა ხნის წინ ჩატარებულ რეფერენდუმსაც შეეხო და განაცხადა, რომ მოვლენები სულ სხვა მიმართულებით განვითარდა და არა ისე, როგორც უმეტესად ხდება ხოლმე.
„რეფერენდუმმა ხელი უნდა შეუწყოს საზოგადოებაში მწვავედ დასმული საკითხების გადაწყვეტას და მოახდინოს მოსახლეობის კონსოლიდაცია. თურქეთის შემთხვევაში პირიქით მოხდა, გაღრმავდა უფსკლული მოსახლეობაში და სახელმწიფო აღარაა კონსოლოდირებული. ჩვენი ინტერესია, რომ მეზობელ ქვეყანაში იყოს მშვიდი სიტუაცია და დალაგებული სისტემა“, - განაცხადა მენაღარიშვილმა.