მშრომელთა სოლიდარობის საერთაშორისო დღეს თბილისში მასშტაბური მსვლელობები იგეგმება, - ამის შესახებ ინფორმაციას პროფკავშირები ავრცელებს, რომელსაც უცვლელად გთავაზობთ:
,,საპირველმაისო საპროტესტო მსვლელობების მონაწილეები ერთობლივ მანიფესტს მიიღებენ და ხელისუფლებას მანიფესტაციის დასრულების შემდეგ გაუგზავნიან.
მშრომელთა უფლებების და მათ წინაშე მდგარი მწვავე პრობლემების გარშემო პროფკავშირები და ათობით არასამთვრობო და სტუდენტური ორგანიზაცია გაერთიანდა.
ისინი ყურადღებას ამახვილებენ იმაზე რომ მნიშვნელოვანია, ქვეყნის ხელისუფლებამ დროულად გაათვიცნობიეროს ის ფაქტი, რომ დასავლური ფასეულობების დამკვიდრება, საზოგადოებაში მათი პოპულარიზაცია და მათკენ სწრაფვა ვერ გახდება შესაძლებელი ამ ფასეულობათა მხოლოდ ეფემერული და დეკლარირებული ხასიათით. საჭიროა, რომ ევროკავშირში ინტეგრაციის თანმხლები ყველა სიკეთე და შესაძლებლობა სრულად იქნეს რეალიზებული და გახდეს თანაბრად ხელმისაწვდომი ჩვენი ქვეყნის თითოეული მოქალაქისთვის. საქართველოს მშრომელთათვის ევროპული არჩევანი უპირობოდ უკავშირდება ქვეყანაში ღირსეული შრომის პრინციპების დამკვიდრებას, ევროპული სტანდარტების შესაბამისი სამართლიანი და უსაფრთხო პირობების შექმნას, გამართულად ფუნქციონირებად შრომის ბაზარს, მაღალხარისხიან სოციალურ დაცვას, ქალთა შრომითი უფლებრივი მდგომარეობის გაუმჯობესებას, მათი დისკრიმინაციისაგან დაცვას, ინტენსიურ სოციალურ დიალოგს და დამსაქმებელთან უფლებრივი თანასწორობის პრინციპებს. დემოკრატიული სამყაროს ამ მონაპოვართა ყოველდღიურ ცხოვრებაში გატარების გარეშე, ყოველი ხმამაღალი განცხადება ევროატლანტიკურ სივრცეში ინტეგრირების კუთხით, მოკლებულია ყოველგვარ აზრს და პერსპექტივას.
საპროტესტო მსვლელობას სტუდენტური მოძრაობების, პროფკავშირების ახალგაზრდული ფრთის და ათობით არასამთვრობო ორგანიზაცის წარმომადგენლები თბილისის ივანე ჯავახიშვილის სახელმწიფო უნივერსიტეტის პირველი კორპუსის მიმდებარე ტერიტორიიდან 13:00 საათზე დაიწყებენ და 15:00 საათზე პროფკავშირების გაერთიანების ათასობით წარმომადგენელს შეუერთდებიან, რომლებიც ვარდების მოედანზე იქნებიან შეკრებილნი. ვარდების მოედნიდან მასშტაბური მსვლელობა საქართველოს პარლამენტის შენობისკენ გაემართება სადაც დემონსტრაცია შედგება და მიიღებენ ერთობლივ მანიფესტს.
საპირველმაისო მანიფესტაცია საქართველოსა და ევროპის ქვეყნებში ჯაჭვურად ერთი ლოზუნგით ჩაივლის - დასრულდეს კორპორატიული სიხარბე - მსოფლიოს სჭირდება უკეთესი ხელფასები“ - ნათქვამია განცხადებაში.
