მოულოდნელი არ იყო, რომ დავით უსუფაშვილი ასეთ გადაწყვეტილებას მიიღებდა,- განაცხადა პოლიტოლოგმა მამუკა არეშიძემ "ჯი-ეიჩ-ენთან" საუბარში. მისი თქმით, ყოფილი პარლამენტის თავმჯდომარის კვლავ პოლიტიკაში დაბრუნება გასაკვირი არაა, რადგან მას ჯერ კიდევ აქვს პოლიტიკური რესურსი.
" ვფიქრობ, მას აქვს გარკვეული რესურსი, რათა თავი წარმოაჩინოს. რესპუბლიკური პარტიის მხარდამჭერები, ასეთი კი მოსახლეობის 2-3%-ია სწორედ უსუფაშვილის ფაქტორის გამო უჭერდნენ მხარს, განსაკუთრებით კი რეგიონებში. მართალია დღევანდელი გადმოსახედიდან მას გაუჭირდება გადამწყვეტი უპირატესობის მიღება, მაგრამ თუ მან რაიმე ახალი მიდგომების დემონსტრირება მოახდინა, ყველაფერი შესაძლებელია. ვფიქრობ იგი ჩამოყალიბდება, როგორც ზომიერი ოპოზიცია",- განაცხადა არეშიძემ.
მან პრეზიდენტ გიორგი მარგველაშვილისა და დავით უსუფაშვილის შესაძლო გაერთიანებაზე გავრცელებულ ხმებზეც ისაუბრა, თუმცა აღნიშნა, რომ ჯერ-ჯერობით ამის ნიშნები არ იკვეთება.
"წინასწარ ვერაფერს ვიტყვით, მე ეჭვი მეპარება, თუმცა არც გამოვრიცხავ. ბევრი მოარული ხმა არის ამასთან დაკავშირებით",- აღნიშნა მამუკა არეშიძემ "ჯი-ეიჩ-ენთან" საუბრისას".