"საერთაშორისო გამჭვირვალობა-საქართველო" "აუცილებელი საზოგადოებრივი საჭიროებისთვის საკუთრების ჩამორთმევის შესახებ" მთავრობის საკანონმდებლო პროექტში სამართლებრივ ხარვეზებს ხედავს. ამის შესახებ ორგანიზაციის იურისტმა თეო ზაქარაშვილმა ისაუბრა.
მისი შეფასებით, ახალი კანონპროექტი ბევრ პროცედურულ საკითხთან დაკავშირებით უკეთეს სტანდარტს ამკვიდრებს, ვიდრე დღეს მოქმედი კანონი, თუმცა არის ხარვეზები, რომელიც უნდა გამოსწორდეს.
მისივე განცხადებით, არსებობს დაბრკოლებები, რაც შეიძლება - მესაკუთრეებს შეხვდეს, როცა ექსპროპრიატორი მისი ქონების ჩამორთმევისთვის სასამართლოს მიმართავს.
"პრაქტიკიდან გამომდინარე, არსებობს დაბრკოლებები, რაც შეიძლება - მესაკუთრეებს შეხვდეს, როცა ექსპროპრიატორი მისი ქონების ჩამორთმევისთვის სასამართლოს მიმართავს. კანონპროექტი ჩვენ ორი პრინციპისგან შემდგარ სისტემას გვთავაზობს: - მიწის ჩამორთმევის საკითხზე სასამართლო ადმინისტრაციული წესით მსჯელობს, ხოლო კომპენსაციასთან დაკავშირებით - სამოქალაქო წესით. ის, რომ ადმინისტრაციულის მიერ დადგენილ ფასს სამოქალაქომ უნდა გადახედოს, ვფიქრობთ, რომ სამართლებრივი პრინციპიდან გამომდინარე, სწორი მიდგომა არ არის. გამოდის, რომ ქონების ექსპროპრიაციის შემთხვევაში, პროცესი ადმინისტრაციული წესით სწრაფად უნდა წავიდეს, ხოლო თუკი მოქალაქე გადაწყვეტს, რომ ფასი არ არის სათანადო, ეს სასამართლომ სამოქალაქო წესით უნდა განიხილოს. ეს ნიშნავს, რომ დავა ძალიან დიდხანს შეიძლება გაგრძელდეს, რაც მესაკუთრისთვის შეიძლება არ არის მისაღები და კომფორტული, როცა ექსპროპრიატორისთვის ძალიან მისაღები და კომფორტულია საკითხის სწაფად განხილვა და ქონების მიღება“, - განაცხადა “საერთაშორისო გამჭვირვალობა-საქართველოს“ იურისტმა, რომელმაც იმედი გამოთქვა, რომ პროექტი მეორე მოსმენით განხილვისას დაიხვეწება.
ცნობისთვის, "აუცილებელი საზოგადოებრივი საჭიროებისთვის საკუთრების ჩამორთმევის წესის შესახებ" მთავრობის კანონპროექტი პარლამენტის რეგიონული პოლიტიკისა და თვითმმართველობის კომიტეტმა პირველი მოსმენით განიხილა და მხარი დაუჭირა.