ვიდრე იარსებებს ე.წ. ბლოკები, მანამდე იქნება დაბალი მოტივაცია პარტიებს შორის, რომ ისინი გაძლიერდნენ, - ამის შესახებ საქართველოს პარლამენტის თავმჯდომარემ ირაკლი კობახიძემ ბიზნესმენებთან შეხვედრაზე განაცხადა.
მისი განცხადებით, დღეს საქართველოში წარმოდგენილია 20 კვალიფიციური პარტია და ყველამ ვიცით, რომ საქართველოში 20 პარტია არ არსებობს.
მისივე თქმით, მიღებულია გადაწყვეტილება, რომ შერეული სისტემა პროპორციული საარჩევნო სისტემით ჩანაცვლდეს.
„ამ სისტემას აქვს რამოდენიმე ელემენტი, პირველი ელემენტი ეს არის ის, რომ უქმდება პარტიების ბლოკის ინსტიტუტი, ამას აქვს თავისი მყარი არგუმენტი. ის, რომ დღემდე საქართველოში არ არის ჩამოყალიბებული სისტემა, დიდწილად არის ბლოკის დამსახურება. ვიდრე იარსებებს ე.წ. ბლოკები, მანამდე იქნება დაბალი მოტივაცია პარტიებს შორის, რომ ისინი გაძლიერდნენ. მუდმივად გვექნება მერკანტილური გარიგებები და მუდმივად გვექნება პოლიტიკური სისტემა, სადაც ერთი ან ორკაციან ე.წ. პარტიებს ეწოდებათ პოლიტიკური პარტიები. დღეს საქართველოში წარმოდგენილია 20 კვალიფიციური პარტია და ყველამ ვიცით, რომ საქართველოში 20 პარტია არ არსებობს. ეს არის იმის შედეგი, რომ საქართველოში მოქმედებს არასწორი ინსტიტუტები და ამ კუთხით უპირველესი არის ბლოკის ინსტიტუტი, რაც დაბრკოლებას უქმნის საქართველოში არსებული სისტემის განვითარებას“, - განაცხადა ირაკლი კობახიძემ.
კობახიძემ ასევე აღნიშნა, რომ იყო ორი შემთხვევა, როდესაც კონკრეტულმა ხელისუფლებამ თავის თავზე მოირგეს კონსტიტუცია იმ საარჩევნო სისტემის წყალობით, რომელიც იყო დადგენილი.
"ამჟამად გვაქვს ფუნდამენტური ცვლილებები. დღეს მოქმედებს შერეული სისტემა პროპორციული და მაჟორიტარული, რომელიც სამართლებრივი თვალსაზრისით არის თავსებადი, თუმცა ამის მიუხედავად ჩვენ განვაცხადეთ, რომ ვდგამთ ნაბიჯს სხვა ტიპის სიახლისკენ, ეს არის არსებითად პრინციპული სისტემა. მთავარი ამოსავალი წერტილი არის ის, რომ შერეულმა სისტემამ თავის ნაკლოვანებები გამოაჩინა. გვქონდა ორი შემთხვევა, როდესაც კონკრეტულმა ხელისუფლებამ თავის თავზე მოირგეს კონსტიტუცია იმ საარჩევნო სისტემის წყალობით, რომელიც იყო დადგენილი“, - განაცხადა ირაკლი კობახიძემ.