პირველ მაისს 15:00 საათზე პროკურატურასთან საპროტესტო აქცია გაიმართება. ამის შესახებ განზრახ მკვლელობის მცდელობისთვის ბრალდებული ვაჟა ნაჭყებიას ოჯახის წევრები აანონსებენ. ნაჭყებიას დედის, ხათუნა არჩვაძის თქმით, მისი შვილი უკანონოდაა დაჭერილი და პოლიციის თანამშრომლის, მანუჩარ მაისურაძის მსხვერპლია, მოსამართლე ლილი მსხილაძემ კი ბრალდებულს 10 წლიანი პატიმრობა უსამართლოდ მიუსაჯა. ოჯახი საზოგადოებას აქციაზე მისვლისა და თანადგომისკენ მოუწოდებს.
"მოსამართლე ლილი მსხილაძემ გამოიტანა არაობიექტური და უსამართლო განაჩენი. ჩემს შვილს, რომელსაც სცემეს, დაჭრეს იარაღით და დანით, კიდევ 10 წლით თავისუფლების აღკვეთა მიუსაჯეს. ამ ხნის განმავლობაში, საქმის ობიექტურ გამოძიებას ვითხოვდი, არაერთხელ მივმართე მთავარ პროკურორ ირაკლი შოთაძეს, მაგრამ დარწმუნებული ვარ, მას ინფორმაცია არ მიაწოდეს და საქმე პროკურატურას თაროზე უდევს",- განაცხადა ხათუნა არჩვაძემ "ჯი-ეიჩ-ენთან" 2016 წელს ჩაწერილ ინტერვიუში.
ხათუნა არჩვაძე: ჩემი შვილი დაჭრეს იარაღით და კიდევ 10 წლით თავისუფლების აღკვეთა მიუსაჯეს