„საგანგაშო არაფერია, ლარი ნახულობს წონასწორობის ნიშნულს“- განაცხადა „ჯი-ეიჩ-ენთან“ საუბარში ეკონომისტმა ლევან კალანდაძემ.
მისი თქმით, ბოლო დროს ლარის რყევებში არაფერია განსაკუთრებული და იგი ქვეყნის ეკონომიკის შესაბამისად ცურავს.
„ლარს აქვს მცურავი კურსი და იგი დამოკიდებულია ქვეყანაში შემოსულ-გასული ვალუტის მოცულობაზე, ანუ უცხოური ვალუტისა და ლარის მოცულობის თანაფარდობაზე“,- განაცხადა კალანდაძემ.
მისივე თქმით, ეკონომიკაში უარყოფითი ტენდენციები არ შეინიშნება და მაკროეკონიმიკური პარამეტრები დადებით ნიშნულზეა, რაც არ გამოიწვევს ეროვნული ვალუტის კურსის მკვერთ ცვლილებებს.
„პრობლემა ჩნდება მაშინ, როდესაც ლარის კურსი უცხოურ ვალუტასთან მიმართებაში ტრენდულ ხასიათს იღებს, ამ შემთხვევაში არ შეინიშნება მსგავსი რამ. თითქმის ყველა მაკროეკონომიკური პარამეტრი დადებით ნიშნულზეა და აქედან გამომდინარე ლარიც დინებას მიჰყვება, ეს დამახასიათებელია მცურავი კურსის მქონე ვალუტისათვის“,- განაცხადა ლევან კალანდაძემ „ჯი-ეიჩ-ენთან“.
შეგახსენებთ, რომ ბოლო დროს ლარს გამყარების კურსი ჰქონდა აღებული და მისი კურსი დოლართან მიმართებაში 2.38-მდე გამყარდა, თუმცა რამოდენიმე დღეა, რაც ლარი მკვეთრად გაუფასურდა და დოლართან მიმართებაში 10 პუნქტით დაეცა.