"გირჩის" მიერ რელიგიური ორგანიზაციის დაარსებას "ნაციონალური მოძრაობის" წევრი რომან გოცირიძე სოციალურ ქსელში ეხმაურება. მის განცხადებას "ჯი-ეიჩ-ენი" უცვლელად გთავაზობთ:
"გირჩთაყვანისმცემლობა!
გირჩმა რელიგიური ორგანიზაცია დააფუძნა. ეს ყველა ადამიანის კონსტიტუციური უფლებაა.
როგორც ნებისმიერ რელიგიურ ორგანიზაციას, ამ ახალ გაერთიანებასაც აქვს რწმენის მოტივით მისი წევრების სამხედრო სამსახურიდან განთავისუფლების მოთხოვნის უფლება. სწორედ ამან გამოიწვია სერიოზული რეაქცია არასერიოზულ, პროვოკაციულ ინიციატივაზე. ის რაც ხუმრობაში უნდა გატარებულიყო, სამართლებრივი განსჯის საგნად იქცა.
გირჩმა მიზანს მიაღწია: დაგვცინა, გამოცდა მოუწყო კანონის უზენაესობის პრინციპებს და სამართლებრივი კაზუსიდან თავის დაღწევის გონივრული გზების ძიებისკენ უბიძგა ხელისუფლებას. მან მორიგი თავსატეხი გააჩინა მარიხუანას საჯაროდ დათესვა-მოყვანის აქციის შემდეგ.
მათი მეტად უტოპიური ეკონომიკური შეხედულებებისაგან განსხვავებით, ”ბიბლიური თავისუფლების ეკლესიის” დაფუძნების კურიოზულმა ფაქტმა თავის მიზნს მიაღწია-ხელისუფლება დააბნია და საგონებელში ჩააგდო. ვერ მიხვდნენ, იცინონ თუ იტირონ, აკრძალონ თუ დაიცვან კონსიტუციით აღიარებული აღმსარებლობის თავისუფლების უფლებები.
გირჩის ეს ნაბიჯი უდაოდ დაარჩება საზოგადოების დემოკრატიული სიმტკცის შეფასების გონებამახვილურ ტესტად.
გირჩამდე ადამიანთა ერთმა ჯგუფმა ”მფრინავი სპაგეტის მონსტრის ეკლესიის” დარეგისტრირება მოითხოვა. უარი უთხრეს. შემდეგ სასამართლში გასაჩივრდა. თუ როგორ დამთავრდა ეს დავა, უცნობია. სახალისო, თუმცა რელიგიურ უმცირესობათა ინტერესების და აღმსარებლობის თავისუფლების დასაცავად მოწოდბული, კანონით ნებადართული ეს საინტერესო პროვოკაცია სადღაც შუა გზაში ჩაიკარგა. ვერ პოვა გაგრძელება. გირჩმა ფაქტობრივად, მისი რეანიმაცია მოახდინა.
რა შეიძლება იყოს შემდეგი ნაბიჯი? ალბათ პლიტიკური პარტიის რელიგიურ ორგანიზაციად გარდაქმნა. გირჩის კულტის დამკვიდრება და გირჩთაყვანისმცემლობა კიდვ უფრო დიდი რეზონანსის მქონე მოვლენა შეიძლება გახდეს, შესაძლოა, მსოფლიო მასშტაბის პრეცედენტიც-ეს იქნება პირველი შემთხვევა ისტორიაში, როდესაც პოლიტიკური პარტია, საარჩევნო სუბიექტი, ეკლესიად გარდაიქმნება.
ეს ქართული რელიგიური ტრადიციების გაგრძელებაც იქნება. ჩვენი წინაპრების წარმოდგენით, ხე ცოცხალი, ღვთებრივი არსება იყო. წმინდა ხეთა შორის საქართველოში ყველაზე მეტად მუხის და ცაცხვის ხის თაყვანისცემა იყო გავრცელებული. გირჩთაყვანისმცელობა ამ ტრადიციის ახალ სიმაღლეზე აყვანა იქნებოდა. ამით ერთ კეთილ საქმესაც ჩაეყრებოდა საფუძველი-არავინ მოჭრიდა საახალწლოდ წმინდა ხეს!
იხარე (გაიხარე) გირჩო!"- წერს რომან გოცირიძე მის პოსტში.
შეგახსენებთ, რომ "გირჩმა" რელიგიური ორგანიზაცია "საქართველოს ქრისტიანული, ევანგელისტური, პროტესტანტული ეკლესია - ბიბლიური თავისუფლება" დააფუძნა, ამ მეთოდით ისინი ახალგაზრდებს სავალდებულო სამხედრო სამსახურისგან თავის არიდებას სთავაზობენ.