„მონიტორინგის განხორციელება ევალება ზედამხედველობის სამსახურს, ეს სამსახური კი ახლა გარემოვაჭრეების აყრითაა დაკავებული და არა მშენებლობებზე სტანდარტების კონტროლით“,- განაცხადა თბილისის საკრებულოს „მოძრაობა თავისუფლებისთვის“ ფრაქციის წევრმა, მამუკა ახვლედიანმა „ჯი-ეიჩ-ენთან“ საუბარში.
მისი თქმით, მერიაში არეულია ფუნქცია-მოვალეობები და შესაბამისი სამსახურები გამართულად ვერ მუშაობენ.
„უნდა მოხდეს უწყებებს შორის მოვალეობების გამიჯვნა და ზედამხედველობის სამსახურმა ყურადღება მიაქციოს მშენებლობებზე უსაფრთხოების ნორმებს კონტროლს. ეს თბილისის მერიის ერთერთი შეცდომაა და მას მოყვება ხოლმე მსგავსი სავალალო შედეგები“-განაცხადა ახვლედიანმა.
მერიასთან ერთად საკითხზე მუშაობა პარლამენტის პრეროგატივაცაა. როგორც მამუკა ახვლედიანმა აღნიშნა, საჭიროა საკანონმდებლო ცვლილებები უკეთესი რეგულაციებისათვის.
„რამდენადაც ჩემთვის ცნობილია, სამშენებლო სექტორის შესახებ პარლამენტში ახალი კანონპროექტებია შესული. ჩვენ მას ჯერ არ გავცნობივათ, თუმცა ვფიქრობ რომ საკითხის განხილვაში თბილისის საკრებულოც უნდა იყოს ჩართული. მშენებლობის უსაფრთხოების ნორმები სწორედ კანონმდებლობის დონეზე უნდა იყოს გამკაცრებული და ამ მხრივ მოქმედი კანონმდებლობა სრულად გადასახედია“-განუცხადა მამუკა ახვლედიანმა „ჯი-ეიჩ-ენს“.