გადაწყვეტილება არის აშკარა უკანონო, დაუსაბუთებელი და უსაფუძვლო, - ასე აფასებს მერაბ ღოღობერიძის ადვოკატი პაატა შავაძე, ბათუმის საქალაქო სასამართლოს გადაწყვეტილებას, რომლის თანახმადაც, 11-12 მარტს აჭარის პოლიციის მთავარ სამმართველოსთან მომხდარის გამო სისხლის სამართლის ბრალდებით დაკავებულ ორ პირს, მერაბ ღოღობერიძეს და ირაკლი ჩხვირკიას აღკვეთის ღონისიების სახით წინასწარი პატიმრობა შეეფარდა.
როგორც მან გადაცემა "არჩევანში" აღნიშნა, სასამართლოს გადაწყვეტილება უსაფუძვლო იყო და მოსამართლემ ვერ დაასაბუთა საკმარისად თავისი გადაწყვეტილება.
„ყველაზე ამაზრზენი გახლავთ ის, რომ როდესაც მე ვკითხე პროკურორს, რომ ერთი საჩივარი თუ არსებობს, რომელიც რომელიმე ბრალდებულთან მიმართებაში რომელიმე მოწმემ მოგმართათ და შემოგჩივლათ, რომ ზემოქმედებას ახდენენ მასზე, მტკიცებულების განადგურების საფრთხე არსებობს, მან მიპასუხა, რომ ეს ადამიანები სოციალურ ქსელში აქტიურობენ. ეს არის ძალიან საშიში ტენდენცია“, - განაცადა პაატა შავაძემ.