ბათუმში ის ჩავიდა დილის 5 საათზე, როდესაც უკვე ყველაფერი დამთავრებული იყო, გადამწვარი ყველაფერი, - ამის შესახებ 11-12 მარტს ბათუმში მომხდარი არეულობების ორგანიზებისთვის ბრალდებული ირაკლი ჩხვირკიას დედამ, ცისანა როსტობაიამ, გადაცემა "არჩევანში" განაცხადა.
მისი თქმით, ირაკლი ჩხვირკია ბათუმში აქციების დაწყებისა და პირველი დარბევის დროს ჯერ კიდევ თბილისში იყო და ამ ყველაფერის ორგანიზებას ვერ შეძლებდა.
„ბათუმში ის ჩავიდა დილის 5 საათზე, როდესაც უკვე ყველაფერი დამთავრებული იყო, გადამწვარი ყველაფერი. ორგანიზატორი, თუ რა ჯანდაბასაც ტენიან, ვერაფრით ვერ იქნებოდა ჩემი შვილი“, - აღნიშნა ცისანა როსტობაიამ.
ბრალდებულის დედამ იმედი გამოთქვა, რომ მოსამართლე სამართლიან გადაწყვეტილებას მიიღებს. მისივე თქმით, ირაკლი ჩხვირკია არსად გაქცევას არ აპირებს და ნებისმიერ დროს გამოძიებასთან თანამშრომლობისთვის მზად არის.
„ჩემი შვილი აფხაზეთიდან ლტოლვილად მოხვდა აჭარაში, აქ გაიზარდა, ისწავლა სკოლაში და აქაურობა ძალიან რომ უყვარს, იმიტომ ჩამოვიდა აქ დილის 5 საათზე", - განაცხადა ცისანა როსტობაიამ.
მან აქვე აღნიშნა, რომ მისი შვილი ბათუმის მოვლენებისთვის მეორე ბრალდებულს, ირაკლი ღოღობერიძეს არ იცნობს.
