„გაზის ყიდვა ტექნიკურად შეუძლებელია, ერთადერთი გზა არის ირანთან კონტრაქტის დადება და გაზის რუსეთიდან მიღება, ანუ სვოპზე ვიყიდოთ და ეს იყოს რუსული გაზის შენიღბვა“,-განაცხადა „ჯი-ეიჩ-ენთან“ საუბარში ექსპერტმა გია ხუხაშვილმა. მისი თქმით, ფიზიკურად რთულია ირანიდან გაზის მოწოდება, ამიტომ დიდი შანსია, რომ კონტრაქტი გაფორმდეს ირანთან და გაზი მოგვაწოდოს რუსეთმა. კიდევ ერთი მიზეზი კი არის ფასი - არსებული აზერბაეჯანული გაზი უფრო იაფია ვიდრე ირანული.
მისი თქმით, არსებობს დასავლეთსა და ირანს შორის ურთიერთობების გართულების რისკი, რის გამოც ახლა შეუფერებელი დროა მასთან ურთიერთობების დასათბობად.
„ირანთან ურთიერთობა თეორიულად შესაძლოა საინტერესო იყოს. ჩვენი გეოპოლიტიკის ტრანზიტული ფუნქციიდან გამომდინარე , მიმზიდველია აღმოსავლეთიდან დასავლეთისკენ მიმავალი დერეფნის განვითარება, ჩვენ ამ მიმართულებით რაღაცას უნდა ვგეგმავდეთ. თუმცა გასათვალისწინებელია საკითხის ისტორიული კონტექსტი, ამ ყველაფრის გააქტიურება დაიწყო იმ ფონზე, როდესაც შეერთებულმა შტატებმა ბოროტების ღერძის ერთერთ მნიშვნელოვან ნაწილად გამოაცხადა ირანი და მომავალში არის დასავლეთსა და ირანს შორის ურთიერთობების გართულების რისკი“,- განაცხადა ხუხაშვილმა.
მან მთავრობას არაგონივრული პოლიტიკა დაუწუნა და სარისკო ნაბიჯების გადადგმაში დაადანაშაულა. მისი თქმით, ამან შესაძლოა ირანთან შეთანხმებული პროექტებიც ჩაიშალოს და თანაც საქართველოს სტრატეგიული პარტნიორების თვალში იმიჯი გაუფუჭოს.
„გაუგებარია ეს ეკლექტიკა, როდესაც უფრო მარტივი იყო, მაშინ არაფერი ვქენით და როდესაც ჩვენს სტრატეგიულ პარტნიორებთან დაეძაბა ურთიერთობა, მაშინ დავიწყეთ ჩახუტება. ეს ყველაფერი ალოგიკური და ბუნდოვანია, ხვალ რომ სანქციების გამკაცრება დაიწყოს შეერთებულმა შტატებმა ძალიან მაინტერესებს თუ რას ვაპირებთ, რა პოზიციას დაიჭერს საქართველო?“, - განაცხადა გია ხუხაშვილმა „ჯი-ეიჩ-ენთან“.
