ევროსაბჭოს საპარლამენტო ასამბლეის პრეზიდენტს გადადგომისკენ ქართული დელეგაციაც მოუწოდებს. ,,რუსთავი 2“ -ის ინფორმაციით, განცხადება დღის ბოლოს სიტყვით გამოსვლის დროს, ზვიად კვაჭანტირაძემ გააკეთა.
მოხსენების დროს ქართველმა დეპუტატმა კიდევ ერთხელ გაუსვა ხაზი ოკუპირებულ ტერიტორიებზე რუსეთის ქმედებებს, რომელიც საერთაშორისო სამართლის ნომრებს არღვევს.
„საქართველო დგას რუსეთის დესტრუქციული პოლიტიკის წინაშე, რომელიც საერთაშორისო ნორმებსა და პრინციპებს პატივს არ სცემს. რუსეთი ხელს აწერს ე.წ. შეთანხმებებს ოკუპირებულ რეჟიმებთან. საქართველოს ოკუპირებულ ტერიტორიებზე ე.წ. არჩევნები და რეფერენდუმები. ქართული მხარე ცდილობს კონფლიქტის გადაჭრის მშვიდობიანი გზები გამოიყენოს.
მინდა გამოვხატო ჩემი პოზიცია ჩვენი ასამბლეის წევრებისა და პრეზიდენტ აგრამუნტის სირიაში ვიზიტთან დაკავშირებით. მიუხედავად ბატონი აგრამუნტის, ესპანელი სენატორისადმი ჩემი პატივისცემის, მინდა მოვუწოდო მას, რომ დაუყოვნებლივ გადადგეს," - განაცხადა ქართული ოცნების წევრმა ზვიად კვაჭანტირაძემ.
დღეს, თბილისის დროით 15:00 საათზე, ევროსაბჭოს საპარლამენტო ასამბლეის სესია გაიმართება, სადაც, სავარაუდოდ, სწორედ პრეზიდენტ პედრო აგრამუნტის საკითხს განიხილავენ. როგორც ცნობილია, დეპუტატები სირიაში მისი ვიზიტის გამო აგრამუნტის გადადგომას ითხოვენ.
