„სხვა ოპოზიციური პარტიებისგან განსხვავებით, ჩვენ არ გამოვედით საკონსტიტუციო კომისიიდან, მანამ არ დაიდო ბოლო დრაფტი“,- განაცხადა „ევროპული საქართველოს“ წევრმა სერგი კაპანაძემ „ჯი-ეიჩ-ენთან“ საუბარში. მან იმ ძირეულ უთანხმოებებზე ისაუბრა, რომლის გამოც პარტიამ კომისია დატოვა.
„ჩვენ ვიყავით ბოლო წუთამდე, სანამ კონსტიტუციის პროექტის ბოლო ვერსია დაიდო. როდესაც აღმოჩნდა, რომ იგი არ ითვალისწინებდა მნიშვნელოვან საკითხებს“,- განაცხადა კაპანაძემ.
მისი თქმით, საზოგადოების ინტერესია, რომ პრეზიდენტის არჩევნები იყოს პირდაპირი და არა ადამიანთა მცირე ჯგუფის მიერ არჩეული.
„მთავარი უთანხმოება, რომელიც გვაქვს ხელისუფლებასთან და რის გამოც გამოვედით კომისიიდან, არის არჩევნების წესი. ეს ქვეყნისთვისაა მნიშვნელოვანი, რათა დემოკრატიულად იფუნქციონიროს სახელმწიფომ და ხელისუფლებაც დემოკრატიული გზით შეიცვალოს. ასევე იყო პრეზიდენტის არჩევითობაც, თანაც იმის ფონზე, რომ მოსახლეობის აბსოლუტური უმრავლესობა მხარს უჭერს, რომ პრეზიდენტი აირჩიოს ხალხმა და არა ივანიშვილმა“- განაცხადა კაპანაძემ „ჯი-ეიჩ-ენთან“ და დასძინა, რომ მათ სცადეს ხელისუფლებისთვის ალტერნატივა შეეთავაზებინათ - „ჩვენ მივმართეთ პრემიერ-მინისტრს და მოვთხოვეთ, რომ პლებისციტი დანიშნოს, რათა ხალხს კითხონ თუ რას ფიქრობენ ამ ორ უმნიშვნელოვანეს საკითხზე. ამაზე ჯერ-ჯერობით მთავრობისგან პასუხი არ მიგვიღია, მაგრამ საპარლამენტო უმრავლესობისგან მივიღეთ არა“.
