„სამშენებლო უსაფრთხოების სტანდარტების მონიტორინგი არ ხორციელდება“, - განაცხადა „ჯი-ეიჩ-ენთან“ საუბარში პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარის მოადგილემ, რევაზ არველაძემ. მისი თქმით, ამჟამად არ არსებობს სამსახური, რომელიც სპეციალიზებულია ამ სფეროს მონიტორინგზე.
„არსებობდა „არქმშენინსპექცია“, რომელსაც ევალებოდა არამარტო შესაბამისობა პროექტთან, არამედ უსაფრთხოების ტექნიკის შემოწმებაც. ახლა პროფკავშირი უნდა აქცევდეს ყურადღებას, მაგრამ როგორც ჩანს, არაა სათანადო ყურადღება ამ საკითხზე“,- განაცხადა რევაზ არველაძემ „ჯი-ეიჩ-ენთან“.
არველაძის თქმით, უსაფრთხოების სტანდარტების შემუშავებისა და პრაქტიკული ღონისძიებების გატარებისთვის კანონმდებლობის შესამაბისობაში მოყვანაც აუცილებელია, ამის შესახებ კი პარლამენტის ჯანდაცვის, შრომის და სოციალური საკითხთა კომიტეტმაც უნდა იზრუნოს.
შეგახსენებთ, რომ გუშინ თბილისში მშენებარე კორპუსიდან მუშა გადმოვარდა. 21 წლის ახალგაზრდა ადგილზევე გარდაიცვალა. როგორც ადგილობრივები აცხადებენ, შენობაში არ იყო დაცული უსაფრთხოების სტანდარტები.
