„ეს არაა პირველი შემთხვევა, ლამის კვირა არ გადის ისე, რომ ხალხი არ დაიღუპოს. კონტროლი არ ხორციელდება“,- განაცხადა „ჯი-ეიჩ-ენთან“ საუბარში თბილისის საკრებულოს წევრმა, ალეკო ელისაშვილმა.
მან დედაქალაქში მიმდინარე მშენებლობებზე უსაფრთხოების ზომების დაცვის შესახებ ისაუბრა. როგორც ელისაშვილმა აღნიშნა, ხელისუფლების მხრიდან არ ხორციელდება კონტროლი, თუ რამდენად დაცულია ობიექტზე მომუშავეთა სიცოცხლე.
„ჯერ კიდევ ბენდუქიძემ დაიწყო ლაპარაკი იმის შესახებ, რომ ეს ყველაფერი ზედმეტი იქნებოდა და ბიზნესს შეაფერხებდა. დღესდღეობით კი ხედავთ როგორი განვითარებულია ბიზნესი. ფაქტია რომ ყველაფერი არ უნდა იყოს ასე, მაგრამ ვითარება არ იცვლება“, -განაცხადა ალეკო ელისაშვილმა.
მან საკრებულოს უფლებამოსილებაზეც ისაუბრა და დასძინა, რომ შესაბამის ორგანოებში არაა დიდი სურვილი, რათა პრობლემა მოგვარდეს.
„შრომის უსაფრთხოების კონცეფცია უნდა აამოქმედონ, თუმცა ყურს არ იბერტყავენ. ეს საკრებულოს დონეზე არ იქნება, რადგან მხოლოდ თბილისში არაა მსგავსი პრობლემა. ხეისუფლებაში კი როგორც ჩანს არაა ამის მოგვარების სურვილი“,- განაცხადა ალეკო ელისაშვილმა „ჯი-ეიჩ-ენთან“.