საფრანგეთის პრეზიდენტმა ფრანსუა ჰოლანდმა მეორე ტურში გადასვლა მემარცხენე ცენტრისტული პარტიის ლიდერს ემანუელ მაკრონს მიულოცა. მათ შორის სატელეფონო საუბარი შედგა. ამის შესახებ ინფორმაციას ფრანგული მედია ავრცელებს.
შეგახსენებთ, ეგზიტპოლის მიხედვით, საფრანგეთის საპრეზიდენტო არჩევნების მეორე ტურში ემანუელ მაკრონი და მარინ ლე პენი გადავიდნენ. მაკრონს წინასწარი მონაცემებით, არჩევნებში მონაწილეთა 23.7%-მა დაუჭირა მხარი, ხოლო ლე პენს 21.7%-მა. ეგზიტპოლი ფრანგულმა ტელევიზიამ France 24-მა გამოაცხადა.
მარინ ლე პენი საფრანგეთის ულტრამემარჯვენე პარტია „ეროვნული ფრონტის“ ლიდერია, ხოლო ემანუელ მაკრონი „ცენტრისტია“.
საფრანგეთში საარჩევნო უბნები უკვე დაიხურა და ხმების დათვლა მიმდინარეობს.
