„საქართველოს უკრაინასთან განსაკუთრებული ურთიერთობები აკავშირებს, როგორც მოგეხსენებათ, რაც, გარდა მჭიდრო და მეტად მეგობრული ხალხთაშორისი ურთიერთობებისა, დაფუძნებულია ჩვენს საერთო ინტერესებზე და სწრაფვაზე, ვიყოთ თავისუფალი სამყაროს სრულფასოვანი ნაწილი“ - ამის შესახებ საქართველოს საგარეო საქმეთა მინისტრმა მიხეილ ჯანელიძემ უკრაინელ კოლეგასთან პავლო კლიმკინთან ერთად გამართულ ერთობლივ პრეს-კონფერენციაზე განაცხადა.
საქართველოს საგარეო უწყების ხელმძღვანელის განცხადებით ორ ქვეყანას მსგავსი პრობლემები და ერთიანი გამოწვევები გააჩნია. მიხეილ ჯანელიძემ დაგმო ყირიმის ავტონომიური რესპუბლიკისა და ქალაქი სევასტოპოლის ოკუპაცია და ანექსია ისევე, როგორც რუსეთის ფედერაციის აგრესიული და უკანონო ქმედებები უკრაინის აღმოსავლეთ რეგიონებში.
მინისტრმა კიდევ ერთხელ დაადასტურა საქართველოს მხარდაჭერა უკრაინის ტერიტორიული მთლიანობისა და სუვერენიტეტისადმი და გაზი გაუსვა, რომ საქართველოსა და უკრაინის ტერიტორიების დე-ოკუპაციისთვის 2008 წლის 12 აგვისტოსა და მინსკის შეთანხმებების შესრულება არის აუცილებელი.
როგორც პრეს-კონფერენციაზე მიხეილ ჯანელიძემ განაცხადა ურთიერთ მხარდაჭერის მიმართულებით ორ ქვეყანას შორის არსებული ორმხრივი თანამშრომლობა გრძელდება და აღნიშნა, რომ საქართველო კვლავ გააგრძელებს უკრაინის მტკიცე მხარდაჭერას ყველა ფორმატში.
„ჩვენ ასევე ვთანამშრომლობთ საერთო გამოწვევების გათვალისწინებით, საერთაშორისო ასპარეზზე თანამეგობრობის მხარდაჭერის მობილიზების მიზნით. შეხვედრისას ყურადღება გავამახვილეთ საერთო ძალისხმევის გაგრძელების აუცილებლობაზე და ასევე ერთიანი პოზიციის მნიშვნელობაზე“ - განაცხადა მინისტრმა.
როგორც საგარეო უწყების ხელმძღვანელმა აღნიშნა, საქართველო მზადაა უკრაინულ მხარეს გაუზიაროს გამოცდილება კონფლიქტთან და მისი მშვიდობიანი დარეგულირების საკითხებთან დაკავშირებით.