„ჩვენ რუსთავის მაგალითზე გავაკეთეთ დაკვირვება და საკუთარი ავტომობილით 60-70% დამოუკიდებლად ვერ ჩამოდის თბილისში“, - განაცხადა „ჯი-ეიჩ-ენთან“ საუბარში „პარტნიორობა საგზაო უსაფრთხოებისთვის“ წარმომადგენელმა, ირაკლი იზორიამ. მისი თქმით, მართვის მოწმობის აღება ძალიან მარტივია.
„ავტო სკოლებში აქვთ ე.წ. 3-4 დღიანი მართვის მოწმობის აღების კურსი, სადაც დაზეპირებული მეთოდებით ასწავლიან. ყოველივე მსგავსი კი ერთიანობაში ქმნის იმ შედეგს, რაც არის ამჟამად საქართველოში“- განაცხადა იზორიამ.
მან საგზაო მოძრაობის მოწესრიგებაში პატრულის როლზეც ისაუბრა. იზორიას თქმით, პოლიცია ვერ ახერხებს ქუჩებში საკმარისი კონტროლის განხორციელებას.
„შუქნიშნებსა და ზებრა გადასასვლელებზე ავტომობილები არ ჯარიმდებიან ან ვერ ჯარიმდებიან. ბოლო დროს იყო რამოდენიმე შემთხვევა, როდესაც საღამოს გამოდიოდა პატრული და აკონტროლებდა გადასასვლელებს, თუმცა ამას უნდა ჰქონდეს მასშტაბური ხასიათი და არა ერთეული შემთხვევები. ვფიქრობთ ქულათა სისტემის შემოღება პატრულისათვის დამატებითი მოტივაცია იქნება, რომ დამრღვევი მძღოლები გამოავლინონ“,-განაცხადა "ჯი-ეიჩ-ენთან" ირაკლი იზორიამ.
დღეს პარლამენტმა მესამე მოსმენით მიიღო კანონპროექტი „საგზაო მოძრაობის შესახებ“. კენჭისყრაზე კანონს მხარი 89 დეპუტატმა დაუჭირა. ამ საკანონმდებლო ცვლილებით პირველი ივლისიდან მართვის მოწმობის 100 ქულიანი სისტემა და უკონტაქტო პატრულირება ამოქმედდება.
